У Менску прайшла моладзевая акцыя «Беларусь у Эўропу» (Фота) :: Хартыя'97 :: Навiны

14 лютага па вуліцамі Менску прайшло моладзевае шэсьце “Беларусь у Эўропу”, у час якога ўдзельнікі раздавалі “валянцінкі” з прызнаньнем у каханьні да Эўропы і віншавалі амбасады заходніх дзяржаваў.

Акцыя пачалася а 18 гадзіне на плошчы Свабоды, дзе маладафронтаўцы разгарнулі расьцяжку “Акцыя каханьня”, а затым, скандуючы “Жыве Беларусь”, падаліся пад францускую амбасаду, паведамляе “Радыё Рацыя”. Удзел у акцыі прынялі некалькі соцен чалавек.

Каля амбасады Францыі перад моладзьдзю выступіў лідэр дэмакратычных сілаў Беларусі Аляксандар Мілінкевіч, які прыйшоў падтрымаць удзельнікаў акцыі.

— Мы даб’емся дэмакратычных пераменаў і будзем жыць у нармальнай краіне і ў свабоднай Эўропе — сказаў Мілінкевіч.

Пасьля слова ўзяў моладзевы актывіст Барыс Гарэцкі — моладзь заклікала вызваліць беларускіх палітвязьняў. Прадстаўнік францускай амбасады выказаў салідарнасьць з каштоўнасьцямі беларускай дэмакратычнай моладзі.

Міліцыя — галоўным чынам у цывільным — не перашкаджала ў правядзеньні акцыі, але, калі ўдзельнікі шэсьця накіраваліся пад нямецкую амбасаду, міліцыянты затрымалі Гарэцкага.

Моладзь перадала ў нямецкае дыпляматычнае прадстаўніцтва кветкі і віншаваньні з нагоды Дня сьвятога Валянціна, а таксама пэтыцыю, у якой гаворыцца пра неабходнасьць уступленьня Беларусі ў Эўразьвяз. Пасьля ўдзельнікі акцыі рушылі пад амбасаду Злучаных Штатаў.

— Вельмі добра, што ў мяне была магчымасьць сустрэцца з актывістамі Маладога Фронту, — заявіў прадстаўнік амбасады ЗША Джонатан Мур, адказваючы на віншаваньні моладзі ды яе пэтыцыю аб прывязанасьці да дэмакратычных каштоўнасьцяў.

Падчас шэсця ад адной амбасады да другой дэманстранты скандавалі: "Жыве Беларусь!", "Верым, можам, пераможам!", "Беларусь — у Еўропу!".

Пазней “Радыё Свабода” паведаміла, што усе актывісты “Моладзі БНФ”, якія былі затрыманы напярэдадні акцыі на плошчы Якуба Коласа, адпушчаны з міліцэйскага пастарунку. Хлопцаў зьнялі для відэатэкі Савецкага райаддзелу міліцыі і ўзялі адбіткі пальцаў.

Пазней з Цэнтральнага РУУС на волю былі адпушчаны затрыманыя актывісты “Маладога фронту” – Барыс Гарэцкі і яшчэ чацьвёра ягоных паплечнікаў.

Такім чынам, усе затрыманыя падчас сьвяткаваньня Дня Валянціна знаходзяцца на волі.