Пробкі на расейска-беларускай мяжы – звычайная справа? :: Хартыя'97 :: Навiны

Дзяржаўны мытны камітэт Беларусі не лічыць, што вялікая колькасць аўтамабіляў на беларуска-расейскай мяжы з’яўляецца катастрафічнай, заявіў на брыфінгу намеснік начальніка ўпраўлення арганізацыі мытнага кантролю ДМК Андрэй Планін. “Пробкі на расейска-беларускай мяжы ўзнікаюць перыядычна, і я не казаў бы, што сёння там складаецца катастрафічная сітуацыя”, – сказаў А.Планін.

Па яго дадзеных, “13 лютага на беларуска-раесйскай мяжы працягласць чаргі склала каля 1 км, 12 лютага навала аўтамабіляў пачалася каля 14 гадзіны дня, і была цалкам ліквідавана да поўначы ”, паведамляе “Інтэрфакс”.

А.Планін сказаў, што прычынай навалы аўтамабіляў стала адмена Федэральнай мытнай службай (ФМС) Расеі працэдуры рэгістрацыі часовага ўвозу аўтамабіля па месцы прыбыцця. “Цяпер афармленне часовага ўвозу аўтамабіля мусіць здзяйсняцца толькі ў пунктах мытнага афармлення, што і выклікала некаторую напружанасць”, – растлумачыў ён.

Па словах прадстаўніка мытнага ведамства Беларусі, афармленне 1 аўтамабіля займае 30 хвілін пры ўмове наяўнасці ўсіх дакументаў. Кошт мытнага афармлення складае 100 расейскіх рублёў, плацяжы прымаюцца толькі ў расейскіх рублях. “Часам бывае, што не ва ўсіх з сабою ёсць расейскія грошы, а каля мытнага паста не ўсюды ёсць пункты абмену валют, што таксама выклікае пэўныя складанасці”, – адзначыў А.Планін.

Ён зазначыў, што Беларусь перыядычна спрабуе весці перамовы з ФМС Расеі наконт спрашчэння працэдуры ўвозу транспартных сродкаў на тэрыторыю Расеі. Аднак, па яго словах, “сёння мы не маем магчымасці ўплываць на расейскае заканадаўства”.

Фота lenta.ru