Сяргей Калякін: З Мілінкевічам альбо без яго, але кангрэс адбудзецца :: Хартыя'97 :: Навiны

У шэрагах апазіцыі спакойна ставяцца да ўчорашняй заявы старшыні Палітрады аб’яднаных дэмакратычных сілаў Аляксандра Мілінкевіча аб адмове удзельнічаць у Кангрэсе прыхільнікаў дэмакратычных пераменаў. Гэтае мерапрыемства, нагадаем, мусіць адбыцца ў сярэдзіне сакавіка.

Сваю адмову палітык абгрунтаваў тым, што Кангрэс замест шырокага форума апазіцыі, хутчэй за ўсё, ператворыцца ў палігон для высвятлення адносінаў паміж лідэрамі палітычных структур. “Я больш не магу заставацца заложнікам такой сітуацыі і не хачу ўдзельнічаць ва ўнутраных разборках. Дэмакратаў шмат у чым справядліва папракаюць у адсутнасці рэальных дзеянняў. Я супраць таго, каб канкурэнцыя паміж лідэрамі партый паглынула ўвесь патэнцыял дэмакратычнай кааліцыі”, – зазначыў у сваёй заяве Аляксандр Мілінкевіч.

Лідэр Партыі камуністаў Беларускай Сяргей Калякін, які ў 2006 годзе ўзначальваў перадвыбарны штаб Аляксандра Мілінкевіча, сказаў у інтэрв’ю “Белорусскому партизану”, што лічыць рашэнне палітыка “не вельмі дальнабачным”.

“Калі ён не хоча ўдзельнічаць у агульнадэмакратычным працэсе, то гэта яго права. Але рашэнне аднаго чалавека, які не мае рэальных структур, не можа спыніць падрыхтоўку кангрэса. Таму з Мілінкевічам або без яго, але кангрэс адбудзецца”, – сказаў С.Калякін. Пры гэтым ён адзначыў, што, як правіла, спробы асобных людзей ісці па-за рэчышчам агульнага палітычнага працэсу завяршаюцца няўдала.