Дакладчык ПАРЕ мае намер падрабязна вывучыць сітуацыю ў Беларусі :: Хартыя'97 :: Навiны

“Я лічу, што вельмі важна пачаць сваю працу, маючы пэўнае ўяўленне наконт сітуацыі ў Беларусі”, – заявіў у эксклюзіўным інтэрв’ю БелаПАН новы дакладчык Парламенцкай Асамблеі Рады Еўропы (ПАРЕ) па Беларусі італьянскі дэпутат Андрэа Рыгоні. На яго думку, вельмі важна вывучыць сітуацыю з захаваннем такіх дэмакратычных стандартаў, як свабода меркаванняў, свабода прэсы і незалежнасць судовай сістэмы.

Ужо на пачатку сакавіка новы дакладчык ПАРЕ мае намер, па яго словах, сустрэцца з кіраўніцтвам беларускага “парламента”.

А.Рыгоні падкрэсліў, што сам прасіў сваіх калегаў з Палітычнага камітэта ПАРЕ прызначыць яго на пасаду дакладчыка па Беларусі. “Я ўжо знаходзіўся ў Беларусі ў сакавіку 2006 года ў якасці міжнароднага назіральніка за прэзідэнцкімі выбарамі, – адзначыў дэпутат. – Мае далейшыя візіты ў вашу краіну будзе планаваць сакратарыят ПАРЕ”.

А.Рыгоні выказаў думку, што ў Беларусі неабходна прасоўваць дэмакратычныя каштоўнасці. “Я спадзяюся на больш высокую гатоўнасць і жаданне з боку беларускіх уладаў на збліжэнне з еўрапейскімі структурамі, у прыватнасці, з Радай Еўропы і Еўрапейскім Звязам”, – сказаў італьянскі дэпутат. Ён адзначыў, што для наладжвання супрацоўніцтва Беларусі неабходна “паважаць і захоўваць каштоўнасці Рады Еўропы”. Пры гэтым А.Рыгоні падкрэсліў, што важны працяглы дыялог не толькі з уладамі, але і з апазіцыяй, прадстаўнікамі грамадзянскай супольнасці і няўрадавымі арганізацыямі.

На думку А.Рыгоні, адкрыццё ў Менску Інфармацыйнага бюро Рады Еўропы паспрыяе наладжванню дыялогу. “Добрым крокам можа стаць і актывізацыя моладзевых абменаў паміж Беларуссю і еўрапейскімі краінамі, а таксама спрашчэнне візавага рэжыму для садзейнічання гэтым абменам”, – сказаў А.Рыгоні.

Італьянскі палітык адзначыў, што наладжванне дыялогу – гэта працяглы працэс, які патрабуе часу. “Але мы павінны быць поўныя рашучасці давесці яго да канца”, – лічыць А.Рыгоні.