У Вашынгтоне адбылася акцыя салідарнасці з народам Беларусі (Фота) :: Хартыя'97 :: Навiны

16 лютага каля беларускай амбасады ў Вашынгтоне адбылася шаснаццатая акцыя салідарнасці з беларускімі палітвязнямі, сем’ямі зніклых апазіцыянераў, з усімі, хто змагаецца за свабоду і дэмакратыю Беларусі. Акцыя была арганізаваная актывістамі грамадскай ініцыятывы “Погляд”. У ёй узялі ўдзел прадстаўнікі грамадзянскай ініцыятывы “Мы памятаем”, студэнты з Беларусі, якія навучаюцца ў ЗША, прадстаўнікі "Беларуска-Амерыканскага Задзіночаньня", а таксама трыццаць жыхароў Нью-Йорка, што спецыяльна прыехалі ў сталіцу ЗША, каб узяць удзел у шаснаццатым Дні салідарнасці з Беларуссю.

Вітаць удзельнікаў дэманстрацыі прыйшоў амбасадар Славакіі ў ЗША, а таксама прадстаўнікі нямецкага фонду Маршала і наведвальнікі прэзентацыі кнігі Паўла Дэмеша і Йорга Форбрыга “Rеclaming Democraсy”, якая адбывалася недалёка ад месца правядзення пікета.

Гэтым разам удзельнікі Дня салідарнасці наладзілі пікет непасрэдна на ўваходзе ў будынак амбасады Беларусі. Супрацоўнікі амбасады атрымалі магчымасць уважліва прачытаць усе надпісы на плакатах дэманстрантаў: “Свабоду палітвязням!”, “Лукашэнка, ты не можаш засадзіць у турму будучыню Беларусі!”.

Шматлікія мінакі задавалі ўдзельнікам акцыі пытанні, выяўлялі сваю салідарнасць з беларусамі. Кіроўцы аўтамабіляў, якія праязджаюць паблізу, гудкамі падтрымлівалі ўдзельнікаў пікету.

Калі акцыя падыходзіла да канца, амбасадар Беларусі ў ЗША Хвастоў выйшаў з будынка амбасады і накіраваўся да свайго службовага аўтамабіля. На гучнае скандаванне ўдзельнікаў Дня салідарнасці “Жыве Беларусь!” ён ніяк не адрэагаваў. Затое плакат “Свабоду Казуліну!”, які ўдзельнікі акцыі прыхінулі да крыла яго машыны, не мог застацца для Хвастова незаўважаным.

“Нягледзячы на дзесяціградусны мароз, чатыры з паловай гадзіны, адведзеныя пад акцыю, для ўдзельнікаў Дня салідарнасці прабеглі непрыкметна. Гэтаму спрыялі бадзёры настрой дэманстрантаў, іх аптымізм і непахісная вера ў свабодную Беларусь”, – гаворыцца ў прэс-рэлізе грамадзянскай ініцыятывы “Мы памятаем”.