Лукашэнка плануе неўзабаве наведаць Судан :: Хартыя'97 :: Навiны

Аляксандр Лукашэнка плануе неўзабаве наведаць Судан з афіцыйным візітам. Пра гэта заявілі сёння на сустрэчы кіраўніка дзяржавы з старшынёй Нацыянальнай асамблеі Рэспублікі Судан Ахмедам Ібрахімам Эль-Тахірам, які знаходзіцца з візітам у Менску.

Аляксандр Лукашэнка заявіў пра неабходнасць інтэнсіфікацыі стасункаў з Суданам, найперш у гандлёва-эканамічнай сферы.

“У нашай знешняй палітыцы, знешнеэканамічнай стратэгіі, Судан займае пэўнае месца”, – адзначыў ён.

Кіраўнік беларускай дзяржавы выказаў здагадку, што візіт парламенцкай дэлегацыі Судана паслужыць “штуршком да інтэнсіфікацыі нашых стасункаў”.

А.Лукашэнка выказаў удзячнасць прэзідэнту Судана за запрашэнне наведаць з візітам гэтую краіну. “Цяпер мы вельмі актыўна працуем над падрыхтоўкай гэтага візіту, і я думаю, што мы зможам неўзабаве сустрэцца ў вашай сталіцы (сталіцы Судана – ІФ)”, – сказаў кіраўнік Беларусі.

А.Лукашэнка лічыць “вялізным патэнцыял двухбаковага эканамічнага супрацоўніцтва, які практычна не запатрабаваны”. “Беларусь валодае тым спектрам тавараў, які цікавы Судану, у сваю чаргу Судан – найбагацейшая краіна ў Афрыцы, якая, у тым ліку, мае магчымасці для стварэння сумесных зборачных вытворчасцяў”, – адзначыў кіраўнік Беларусі.