Амбасадарка Францыі: Беларусі неабходна паважаць пэўныя прынцыпы і каштоўнасці :: Хартыя'97 :: Навiны

“Я спадзяюся, што Францыя здолее паспрыяць рэальнаму і сумленнаму дыялогу паміж Беларуссю і еўрапейскімі краінамі”, – заявіла ў інтэрв’ю БелаПАН надзвычайная і паўнамоцная амбасадарка Францыі ў Беларусі Мірэй Мюсо. Дыпламатка падкрэсліла, што гэта магчыма толькі пры выкананні Беларуссю пэўных умоў. “Для таго каб быць сябрам якой-небудзь сям’і, неабходна паважаць пэўныя прынцыпы і каштоўнасці, якія аб’яднаюць гэтую сям’ю”, – сказала М.Мюсо.

Па яе словах, гаворка ідзе найперш пра захаванне свабоды слова, аб’яднанняў, сродкаў масавай інфармацыі, веравызнання, а таксама пра захаванне прынцыпаў рынкавай эканомікі. “Гэта прадугледжвае стварэнне спрыяльнага клімату для развіцця дзелавога супрацоўніцтва, дзелавых кантактаў і развіцця эканомікі, а таксама існаванне такіх законаў, якія маглі б абараніць эканамічную дзейнасць. Гэта тое, што існуе ва ўсіх нашых краінах”, – адзначыла Мірэй Мюсо.

Ну думку амбасадаркі, Беларусі адведзеная “асаблівая роля ў еўрапейскай сям’і”. “Гэта тая роля, якая дазволіла б Беларусі ўдзельнічаць як у разважаннях, так і ў дзеяннях Еўрапейскага Звяза ў розных формах – у палітычнай, эканамічнай, культурнай, – сказала М.Мюсо. – Мы хочам, каб Беларусь магла цалкам скарыстацца прапанаванай палітыкай добрасуседства”.