Аб’ём транспартоўкі газу ў студзені скараціўся на 17,4% :: Хартыя'97 :: Навiны

Аб’ём транспартоўкі газу па магістральных трубаправодах Беларусі ў студзені 2007 года быў роўны 5,1 млрд.куб.м, што складае 82,6% да ўзроўню студзеня 2006 года. Пра гэта паведамілі БЕЛТА ў Міністэрстве статыстыкі і аналізу Беларусі.

Як растлумачыў у інтэрв’ю карэспандэнту БЕЛТА генеральны дырэктар ААТ “Белтрансгаз” Дзмітрый Казакоў, скарачэнне аб’ёмаў транспартоўкі газу абумоўленае анамальнымі тэмпературнымі ўмовамі, нехарактэрнымі для гэтай пары года, як на тэрыторыі Беларусі, так і ў еўрапейскіх краінах. “У гэтых умовах адбор газу на тэрыторыі Беларусі быў ніжэй запланаванага. Вядома, гэта тычыцца і Еўропы, дзе тэмпература паветра была значна вышэйшай. Там адбор быў яшчэ ніжэйшым”, – дадаў кіраўнік “Белтрансгаза”.

“Я не думаю, што гэта звязана з дыверсіфікацыяй паставак у Заходнюю Еўропу”, – адзначыў ён.

Па словах кіраўніка “Белтрансгаза”, “аб’ёмы транспартоўкі, прадугледжаныя ў заключаных кантрактах, дазволяць нам забяспечыць прырост транзітных патокаў”.

“Мы цяпер працуем над тым, каб паказчыкі экспартнай выручкі за транзіт і пастаўку газу ў Еўропу былі выкананыя ў неабходных аб’ёмах”, – сказаў Дзмітрый Казакоў. Пры гэтым ён падкрэсліў, што канчатковыя аб’ёмы паставак газу ў Еўропу шмат у чым будуць вызначацца пагоднымі ўмовамі ў гэтых краінах.