Беларусы пратэстуюць супраць будаўніцтва ў Кобрыне храма-помніка Аляксандру Сувораву :: Хартыя'97 :: Навiны

З ініцыятывы міжнароднага грамадскага аб’яднання “Згуртаванне беларусаў свету “Бацькаўшчына” ў Кобрыне распачатая акцыя супраць будаўніцтва храма-помніка расейскаму палкаводцу Аляксандру Сувораву. Пра гэта БелаПАН паведаміла старшыня рады ЗБС “Бацькаўшчына” Алена Макоўская. Будаўніцтва храма-помніка, нагадаем, вядзецца пры падтрымцы Рускай праваслаўнай царквы.

“Ацэнка дзеянняў Суворава на беларускай зямлі адназначная: менавіта пад яго кіраўніцтвам надзвычай жорстка душыліся народныя паўстанні канца XVIII стагоддзя, у тым ліку і паўстанне Тадэвуша Касцюшкі, якім сёння ганарыцца Беларусь. Пад кіраўніцтвам Суворава здзяйсняліся злачынствы супраць беларускага народа. Сувораў на штыках прынёс прыгоннае права ў Беларусь. Таму “Бацькаўшчына” выступае супраць узвядзення храма-помніка, які ў вачах беларусаў стане знакам апраўдання кровапраліцця”, – сказала А.Макоўская.

Да кампаніі пратэсту далучыліся грамадскія аб’яднанні “Таварыства беларускай мовы імя Францішка Скарыны” (ТБМ) і “Саюз беларускіх пісьменнікаў”. 20 лютага прадстаўнікі трох грамадскіх аб’яднанняў звярнуліся з адкрытым лістом да мітрапаліта Філарэта з патрабаваннем спыніць будаўніцтва храма-помніка. Аналагічныя звароты накіраваныя прэм’ер-міністру Сяргею Сідорскаму, упаўнаважанаму па справах рэлігій і нацыянальнасцяў Леаніду Гуляку, а таксама кіраўнікам выканаўчай улады Берасцейскай вобласці і горада Кобрына. “Неўзабаве плануецца пачаць шырокую кампанію па зборы подпісаў у падтрымку нашых патрабаванняў”, – паведаміла А.Макоўская.

На фота: дом-музей Аляксандра Суворава ў Кобрыне ўжо ёсць