Мілінкевіч пацвердзіў намер не ўдзельнічаць у кангрэсе :: Хартыя'97 :: Навiны

“Інтэлігенцыя заклікае мяне ўзяць удзел у кангрэсе, бо баіцца расколу ў апазіцыі. Але я не бачу перспектывы ў палітычнай кааліцыі ў рэалізацыі сур’ёзнай дзейнасці, калі ўжываецца прынцып ратацыі”, – так пракаментаваў лідэр дэмакратычных сілаў Беларусі Аляксандр Мілінкевіч у інтэрв’ю БелаПАН заклік прадстаўнікоў інтэлігенцыі ўзяць удзел у запланаваным на сакавік кангрэсе.

Пры гэтым палітык падкрэсліў, што не прапаноўвае ў якасці лідэра дэмсілаў сваю кандыдатуру. “Я гатоў да канкурэнцыі, але ў гэтым кангрэсе ўдзельнічаць не збіраюся”, – падкрэсліў ён.

Нагадаем, што 19 лютага на сустрэчы сябраў Палітрады аб’яднаных дэмакратычных сілаў і прадстаўнікоў інтэлігенцыі апошнія выказаліся за ўдзел у кангрэсе, які мае быць, усіх лідэраў дэмсіл, у тым ліку і А.Мілінкевіча.

Заява Мілінкевіча пра адмову ў працы кангрэса была распаўсюджаная ў СМІ 14 лютага. Сваё рашэнне палітык тлумачыць так: “Замест арганізацыі сумеснай працы некаторыя кіраўнікі партый пачалі змагацца за лідэрства і шматмесячную падрыхтоўку да кангрэса. Шматлікія актывісты так захапіліся барацьбой за месца на гэтым форуме, што забыліся пра галоўнае – працу з людзьмі”.

А. Мілінкевіч таксама выступае супраць ратацыйнага прынцыпу кіравання дэмакратычнай кааліцыяй. Рашэнне аб пераходзе на ратацыйны прынцып было прынятае 15 студзеня на паседжанні Палітрады аб’яднаных дэмакратычных сілаў.