Мінабароны Польшчы: Дазволу ў Расеі ніхто пытацца не будзе, тыя часы мінулі :: Хартыя'97 :: Навiны

Міністр абароны Польшчы Аляксандзер Шчыгла заявіў у інтэрв’ю польскай Gazeta Wyborcza, што Польшча не збіраецца пытацца ў Расеі дазволу на разгортванне ў сябе элементаў амерыканскай сістэмы супрацьракетнай абароны (СРА), паведамляе “Інтэрфакс”. “Я не магу сабе ўявіць, што прадстаўнік польскага ўрада прыедзе ў Маскву для атрымання згоды на будаўніцтва амерыканскага шчыта, – сказаў кіраўнік абароннага ведамства Польшчы. – Тыя дні мінулі і не вернуцца ніколі. Рашэнне польскага ўрада ёсць суверэннае рашэнне”.

Міністр дадаў, што пытанне пра базу – “частка двухбаковых стасункаў” паміж Польшчай і ЗША. Аднак, па словах Шчыгла, Польшча заклікае да “адкрытых дыскусій” па гэтай праблеме.

Кіраўнік Мінабароны Польшчы ў аўторак адправіўся ў Брусэль для сустрэч з кіраўнікамі НАТА і ЕЗ і абмеркавання пытанняў пра амерыканскую базу СРА і польскі вайсковы ўдзел ў аперацыі ў Афганістане.

Нагадаем, што напярэдадні ў радыёінтэрв’ю прэм’ер-міністр Польшчы абвінаваціў Маскву ў спробах вярнуць Польшчу ў сферу свайго ўплыву. Па яго словах, размяшчэнне ў Польшчы амерыканскай базы СРА дасць Варшаве гарантыю таго, што Польшча ўжо не будзе знаходзіцца ў сферы ўплыву Расеі.

Нагадаем таксама, што тэма ўплыву Масквы выразна прагучала ў канцы мінулага тыдня ва ўрадавым дакладзе. У ім гаворыцца, што цесна звязаныя з Расеяй агенты захоўвалі ўплыў у вайсковай выведцы краіны нават пасля яе ўступа ў Еўразвяз і НАТА.

Адзначым, што на мінулым тыдні ў газеце Los Angeles Times быў апублікаваны артыкул намесніка дзяржсакратара ЗША па пытаннях Еўропы і Еўразіі Дэніэла Фрыда, у якой ён рэзка раскрытыкаваў пазіцыю прызнання права Расеі на сферы ўплыву ва Усходняй і Цэнтральнай Еўропе. Фрыд нагадаў, што “новым дэмакратыям Еўропы” было паабяцана, што “дасягнутае імі будзе належаць ім заўсёды, і рашэнні больш не будуць прымацца ў іх за спіной”. “Таму, калі яны захацелі ўступіць у Еўразвяз і Арганізацыю Паўночнаатлантычнай дамовы і паказалі, што здольныя выконваць абавязальніцтвы, звязаныя з гэтым, яны былі прынятыя”, – канстатаваў намеснік дзяржсакратара ЗША.

NEWSru.com