Прадпрыемствы паліўнай прамысловасці зніжаюць аб’ёмы вытворчасці :: Хартыя'97 :: Навiны

Беларускія прадпрыемствы паліўнай прамысловасці ў студзені 2007 года знізілі аб’ём вытворчасці на 0,4 адсотка ў параўнанні з студзенем 2006 года – да 851,8 млрд. рублёў. Пра гэта паведамляе Міністэрства статыстыкі і аналізу.

Па інфармацыі Мінстата, у студзені прадпрыемствамі нафтаперапрацоўчай прамысловасці выраблена прадукцыі на 801,4 млрд. рублёў, што на 0,2% больш за студзень 2006 года. Выраблена 291,3 тыс. тон аўтамабільнага бензіну (на 8,1% больш), 494 тыс. тон дызельнага паліва (на 4,9% больш) і 537,1 тыс. тон топачнага мазуту (на 14,2% менш), паведамляе БелаПАН.

За студзень гэтага года ў краіне здабылі 148,3 тыс. тон нафты, або на 1,1% менш, чым у студзені 2006 года. Аб’ём вытворчасці ў супастаўных цэнах склаў 41,5 млрд. рублёў (на 1,2% менш).

Запасы гатовай прадукцыі ў паліўнай прамысловасці на 1 лютага 2007 года склалі 75,3 млрд. рублёў, або 13,8% да сярэднемесячнага аб’ёму вытворчасці. За месяц запасы гатовай прадукцыі павялічыліся на 11,4%.

Рэнтабельнасць рэалізаванай прадукцыі прадпрыемстваў галіны ў 2006 годзе склала 29,3% (31,2% – у студзені 2006 года) – гэта самы высокі паказчык сярод галін прамысловасці. Рэнтабельнасць продажу склала 17% (19,8%). Доля стратных прадпрыемстваў у галіне ў 2006 годзе была на ўзроўні 24,3%, павялічыўшыся за год на 21,6%.

Пратэрмінаваная крэдыторская запазычанасць за мінулы год склалася на ўзроўні 11,6 млрд. рублёў. За месяц гэты паказчык павялічыўся на 96,6%, а з пачатку года – на 78,5%. Дэбіторская запазычанасць склала 23,8 млрд., павялічыўшыся за месяц на 40%, а з пачатку года паменшылася на 33,5%.