Беларусь прыстрашыла падвысіць пошліну на транзіт нафты :: Хартыя'97 :: Навiны

Урад Беларусі можа падвысіць пошліну на транзіт нафтапрадуктаў з сакавіка гэтага года. Пра гэта заявілі адразу ў Міністэрстве эканомікі і ў Міністэрстве фінансаў краіны, паведамляе “Інтэрфакс”. Падвышэнне стаўкі акцызу неабходнае Беларусі для таго, каб кампенсаваць выдаткі нафтаперапрацоўшчыкаў. Акрамя таго, з прычыны высокай цаны на сырую нафту знізілася рэнтабельнасць экспарту з беларускіх НПЗ. Сітуацыя набыла дадатковае значэнне яшчэ і з той прычыны, што ў лютым кошт нафтапрадуктаў на сусветных рынках знізіўся.

На пачатку 2007 года Беларусь была змушаная адмяніць адваротныя падаткі з выручкі ад продажу нафтапрадуктаў і знізіць стаўку акцызу на іх на 60 адсоткаў. Гэта адбылося таму, што з лютага гэтага года дзейнічае новая схема паставак нафты з Расеі ў Беларусь. Паводле дамоўленасцяў, Расея будзе атрымоўваць 53 даляра за кожную тону пастаўленай нафты. Раней гэтага тарыфу не было ўвогуле, што дазваляла Беларусі перапраўляць расейскае паліва ў Еўропу і збіраць усю экспартную пошліну сабе ў бюджэт.

Цяпер цана паставак нафты ў Беларусь складае каля 225 даляраў за тону. Стаўка транзіту роўная 2.6 даляра за тону на тысячу кіламетраў у бок Польшчы і Нямеччыны, 1.26 даляра ў бок Прыбалтыкі і 1.14 даляра ў бок Украіны.