Шкуру Гітлера выставілі на ўсеагульны агляд (Фота) :: Хартыя'97 :: Навiны

Ізраільскі мастак Боаз Арад прадставіў у Цэнтры сучаснага мастацтва ў Тэль-Авіве інсталяцыю, якая імітуе скурнае покрыва фюрэра, стылізаванае пад шкуру забітай жывёліны.

Зробленая з сінтэтычных матэрыялаў “шкура” Гітлера знаходзіцца ў пакоі Паляўнічых за нацыстамі. Часткай інсталяцыі з’яўляецца таксама рознакаляровая асіметрычная свастыка, намаляваная на сцяне.

Боаз Арад кажа, што менавіта такім спосабам спадзяваўся паказаць свету, “якія шрамы пакінуў Халакост у душах ізраільцян, а таксама звярнуць увагу на злоўжыванне Халакостам, якое на жаль мае месца, у дадзеным выпадку – яго ператварэнне ў насценнае ўпрыгожванне”.

Арад сцвярджае што яго праца – гэта ўвасабленне таго, што зрабіў бы паляўнічы за нацыстамі, атрымаўшы апошні, галоўны прыз – фюрэра.

Паляўнічы за нацыстамі – гэта прыватная асоба або група людзей, якая збірае інфармацыю і высочвае былых нацыстаў, каб яны панеслі пакаранне за ваенныя злачынствы і за Халакост. Самы вядомы паляўнічы за нацыстамі – Сымон Візенталь, які выжыў і нацысцкіх канцлагерах. Ён сканаў у верасні 2005-га на 97–м годзе жыцця. Дзейнасць створанага ім цэнтра дапамагла перадаць правасуддзю больш як тысячу нацысцкіх ваенных злачынцаў, у тым ліку Адольфа Эйхмана, ідэолага “канчатковага рашэння габрэйскага пытання”, гэта значыць, поўнага знішчэння габрэяў.