Італьянскі прэм’ер Рамана Продзі падаў у адстаўку :: Хартыя'97 :: Навiны

Прэм’ер-міністр Італіі Рамана Продзі падаў прашэнне аб сваёй адстаўцы, паведаміла ў сераду ўвечары AFP.

22 лютага прэзідэнт Джорджа Напалітана правядзе кансультацыі з лідэрамі прадстаўленых у парламенце партый з мэтай вырашыць, ці прымаць адстаўку кіраўніка ўрада. Як заявілі ў прэзідэнцкай прэс-службе, Напалітана пакуль не мае намеру афішаваць сваё меркаванне наконт рашэння Продзі.

Італьянскі прэм’ер вырашыў пакінуць сваю пасаду пасля таго, як у сераду Сенат не ўхваліў яго прапаноў наконт далейшага ўдзелу краіны ў аперацыях НАТА ў Афганістане. Продзі прапаноўваў паслаць туды дадатковы кантынгент грамадзянскіх спецыялістаў, адначасова скараціўшы колькасць вайскоўцаў, якія ўдзельнічаюць у баявых дзеяннях супраць руху “Талібан”.

За ініцыятыву кіраўніка кабінета выказаліся 158 сенатараў пры неабходных 160 галасах, супраць яе прагаласавалі 138 парламентараў.

Адразу пасля вынікаў галасавання апазіцыя патрабавала неадкладнай адстаўкі ўрада, які ўзначальвае левацэнтрысцкая кааліцыя.

“Большасці больш няма. Урада Продзі таксама больш няма. Ён праваліўся ў Сенаце”, – заявіў сябра партыі Forza Italia сенатар Рэната Шыфані (Renato Schifani).

Яшчэ раней у знак пратэсту супраць вынікаў унутранага галасавання па Афганістане міністэрскія крэслы пакінулі два сябры Камуністычнай партыі і адзін прадстаўнік партыі “Зялёных”.