БЮТ і «Наша Украіна» пойдуць асобна на выбары :: Хартыя'97 :: Навiны

У выпадку правядзення датэрміновых парламенцкіх выбараў Блок Юліі Цімашэнкі і “Наша Украіна” пойдуць на іх асобнымі блокамі. Пра гэта паведаміла лідэрка партыі БЮТ Юлія Цімашэнка ў нядзелю ў эфіры канала “Інтэр”, паведамляе “Украинская правда”.

“Калі будуць датэрміновыя выбары, мы ў сістэме поўнай каардынацыі дзеянняў ідзем двума блокамі. Наша палітычная сіла пойдзе асобна, “Наша Украіна” асобна, але ў сістэме не барацьбы, а ўзаемнай дапамогі”, – дадала Цімашэнка і падкрэсліла, што “гаворкі пра адзіны спіс няма”.

У той самы час на пытанне пра фармат удзелу ў будучых прэзідэнцкіх выбарах Цімашэнка адказала, што “цяпер рана пра гэта казаць”. Цімашэнка таксама выказала думку, што “было б нядрэнна, калі б спачатку была новая рэдакцыя Канстытуцыі, а пасля датэрміновыя выбары”.

Адказваючы на пытанне аб’яднанай апазіцыі, лідэрка БЮТ сказала: “Мне здаецца, у апазіцыйных аб’яднаннях лідэра прызначыць немагчыма”.

“Мы накіравалі спецыяльныя партыйныя дырэктывы на месца, каб блок, які я ўзначальваю, і “Наша Украіна” стварылі ў фракцыях усіх узроўняў без выключэння адзіныя каманды, і, каб гэтыя адзіныя каманды уцягнулі ў свае шэрагі іншыя дэмакратычныя сілы, якія магчыма ёсць у тых альбо іншых фракцыях, у тых альбо іншых абласцях”, – паведаміла таксама Цімашэнка.

На яе думку, у выпадку правядзення датэрміновых парламенцкіх выбараў у вярхоўную Раду пройдуць 3–4 партыі.

Гаворачы пра пазіцыю Прэзідэнта пасля ўваходу прапрэзідэнцкай “Нашай Украіны” ў аб’яднаную апазіцыю, Цімашэнка падкрэсліла, што “прэзідэнт не можа быць лідэрам апазіцыі, а можа быць толькі прэзідэнтам краіны”.