Яраслаў Раманчук: «Урад збіраецца здзяйсняць прыватызацыйныя здзелкі» :: Хартыя'97 :: Навiны

Сёння на сустрэчы прэм’ер-міністра Беларусі Сяргея Сідорскага з сябрам праўлення “Райфазен Цэнтральбанка Аўстрыя” Патрыкам-Джонам Саерсам Батлерам было заяўленае, што Беларусь у 2007 годзе плануе прыцягнуць да 1 мільярда еўра інвестыцый. “Мільярд еўра інвестыцый ад “Райфазенбанка” – гэта відавочнае перавышэнне ўласных магчымасцяў, бо беларускі “Прыёрбанк”, з якім працуе гэты аўстрыйскі банк, першым прыпыніў выдачу рублёвых крэдытаў. Цераз дадзены фінансавы істытут урад збіраецца здзяйсняць прыватызацыйныя здзелкі, пра якія ніхто пакуль не ведае”, – пракаментаваў дадзеную заяву прэс-цэнтру Хартыі’97 вядомы эканаміст Яраслаў Раманчук.

Па словах Раманчука, інвестыцыі аўстрыйскага банка могуць быць укладзеныя ў піўную галіну (“Прыёрбанк” крэдытаваў піўныя заводы) або ў тытунёвую. “Але з прычыны таго, што ў беларускім бюджэце няма ні слова пра прыватызацыю, а ўрад і Лукашэнка не казалі, што будуць пачынаць дадзены працэс, то магчымы гэтакі “междусобойчик”, як гэта беларускія ўлады ўжо зрабілі з “Славнефтью”, калі прадавалі акцыі. Гэта не дадае стабільнасці і беззваротнасці такога роду пагадненняў, іх заўсёды можна будзе аспрэчыць, бо для паўнавартаснай і празрыстай прыватызацыі патрэбныя конкурс, адкрытыя ўмовы і роўны доступ усіх астатніх”, – лічыць Раманчук.

Эканаміст нагадвае, што “Райфазенбанк” працуе з беларускім “Прыёрбанкам”, які “супрацоўнічае” з цэлым шэрагам беларускіх службоўцаў. “Прыёрбанк” відавочна спрабуе быць той пляцоўкай, на якой будуць легалізаваць свае капіталы беларускія алігархі. Магчымая не прыватызацыя, а раздача ўласнасці “сваім” людзям, фармаванне алігархічных кланаў. Будзе адбывацца так званая “манетызацыя наменклатурнага палажэння” – калі службоўцы будуць “прадаваць” свой статус тым інвестарам, з якімі яны ў апошні час працавалі. Акрамя таго, вядома, што “Райфазенбанк” не з’яўляецца носьбітам празрыстых, карпаратыўных практык, як іншыя заходнееўрапейскія банкі”, – заявіў Яраслаў Раманчук.