МАП разгледзіць узаемадзеянне беларускага ўрада і прафсаюзаў :: Хартыя'97 :: Навiны

На паседжанні Адміністрацыйнага савета Міжнароднай арганізацыі працы (МАП) будзе прадстаўлены даклад аб працы беларускага ўрада па выкананні рэкамендацый МАП. Пра гэта БелаПАН паведаміў выканаўчы дырэктар МАП Кары Тапіола. Пленарныя паседжанні Адміністрацыйнага савета адбудуцца ў Жэневе 27–30 сакавіка.

К.Тапіола адзначыў, што на чарговым раунду кансультацый МАП і беларускай дэлегацыі, які адбыўся ў Жэневе 13–16 лютага, былі абмеркаваныя некаторыя артыкулы законапраекта аб прафсаюзах, падрыхтаваныя беларускім урадам. “Абмеркаванні будуць працягнутыя”, – сказаў К.Тапіола. Ён адзначыў, што МАП таксама ведае пра варыянт законапраекта, падрыхтаваны беларускімі незалежнымі прафсаюзамі.

Нагадаем, рашэнне пра пачатак расследавання ў дачыненні Беларусі было прынятае Адміністрацыйным саветам МАП у 2003 годзе ў сувязі з скаргай беларускіх прафсаюзаў. Спецыяльная камісія аналізавала выконванне беларускім урадам канвенцый МАП “Аб свабодзе аб’яднання і абароне права на арганізацыю ў прафсаюзы” і “Аб праве на арганізацыю ў прафсаюзы і на вядзенне калектыўных перамоваў”. Сітуацыя з захоўваннем правоў прафсаюзаў у рэспубліцы была разгледжаная 9 чэрвеня 2006 года на паседжанні Камітэта па нормах і стандартах МАП у рамках 95-ай Міжнароднай канферэнцыі працы, якая праходзіла ў Жэневе.Было заяўленае, што калі рэкамендацыі МАП па ліквідацыі парушэнняў правоў прафсаюзаў у Беларусі не будуць выкананыя да лістапада 2006 года, рэспубліцы пагражае выключэнне з арганізацыі.