З 1 сакавіка становяцца больш жорсткімі правілы знаходжання замежнікаў у Беларусі :: Хартыя'97 :: Навiны

З 1 сакавіка ўступае ў сілу Кодэкс Рэспублікі Беларусь аб адміністрацыйных правапарушэннях (КаАП) і Працэсуальна-выканаўчы Кодэкс Рэспублікі Беларусь аб адміністрацыйных правапарушэннях (ПВКаАП). Дадзеным заканадаўствам уведзены новы від адміністрацыйнага спагнання – дэпартацыя – які будзе ўжывацца ў дачыненні замежнага грамадзяніна і асобы без грамадзянства за здзяйсненне шэрагу адміністрацыйных правапарушэнняў (раней дадзеная працэдура рэгламентавалася Законам Рэспублікі Беларусь ад 29 снежня 1998 года “Аб іміграцыі”).

Як растлумачылі карэспандэнту БелТА ва ўпраўленні інфармацыі і грамадскіх сувязяў МУС Беларусі, дэпартацыя можа быць ужытая да замежнага грамадзяніна і асобы без грамадзянства ў якасці дадатковага віду спагнання не толькі за парушэнні правіл знаходжання і транзітнага праезду цераз Рэспубліку Беларусь, але і за пазапраўнае перасячэнне дзяржаўнай мяжы Беларусі, памежнага рэжыму або рэжыму ў пунктах пропуску. Гэтая мера адказнасці будзе прызначацца з улікам характару і наступстваў правапарушэння, а таксама асобы вінаватага.

Пры гэтым новы КаАП удасканальвае механізмы забеспячэння права на абарону фізічнай асобы, у дачыненні якой вядзецца адміністрацыйны працэс, а таксама працэдура абскарджання і апратэставання рашэнняў аб дэпартацыі. Таксама ў дыспазіцыю артыкулаў занесеныя ўдакладненні, якія канкрэтызуюць пералік дакументаў (віза Беларусі, міграцыйная карта, сапраўдны пашпарт, дазвол на часовае знаходжанне або рэгістрацыя і г. д.), без якіх знаходжанне ў Беларусі з’яўляецца адміністрацыйным правапарушэннем.

Акрамя таго, дэпартаванаму замежніку або асобе без грамадзянства прызначаецца тэрмін забароны ўезду ў рэспубліку. Паводле новых загадаў дадзены інтэрвал часу вызначаецца з улікам акалічнасцяў, якія паслужылі прычынай дэпартацыі, і можа вар’іраваць ад 1 да 10 гадоў.