Цімашэнку прымаюць у Вашынгтоне Чэйні і Райс, Януковіч абедае з Меркель :: Хартыя'97 :: Навiны

У аўторак увечары лідэрка апазіцыйнай украінскай партыі БЮТ Юлія Цімашэнка прыбыла ў Вашынгтон з трохдзённым візітам. Падчас візіту Цімашэнка сустрэнецца з віцэ-прэзідэнтам ЗША Рычардам Чэйні і Дзяржсакратаром Кандалізай Райс, а таксама з іншымі вышэйшымі палітыкамі і бізнэсмэнамі.

У сераду раніцай Цімашэнка выступіць з прамовай у Цэнтры стратэгічных і міжнародных даследаванняў, у якім у снежні мінулага года выступаў прэм’ер-міністр Украіны Віктар Януковіч. Пасля гэтага ў гонар Цімашэнкі будзе дадзены абед, у якім возьмуць удзел прадстаўнікі экспертных цэнтраў і ўрадавых структур ЗША, вядомыя палітыкі з украінскага і амерыканскага боку.

У гэты самы дзень Цімашэнка сустрэнецца з былым Дзяржсакратаром ЗША Мадлен Олбрайт у Нацыянальным дэмакратычным інстытуце, дасць інтэрв’ю газеце Washington Post і тэлеканалу CNN, паведамляе “Інтэрфакс” са спасылкай на прэс-службу БЮТ.

У чацвер лідэрка БЮТ правядзе перамовы з віцэ-прэзідэнтам ЗША Рычардам Чэйні, а таксама з сенатарам, кіраўніком камітэта сената ЗША па міжнародных стасунках Рычардам Лугарам. Таксама ў гэты дзень адбудзецца сустрэча з кангрэсменамі і прадстаўнікамі украінскай дыяспары.

На пятніцу запланаваная сустрэча Цімашэнкі з дзяржсакратаром ЗША Кандалізай Райс, сенатарамі ад Рэспубліканскай і Дэмакратычнай партый, а таксама з прадстаўнікамі кампаній, якія вядуць бізнэс ва Украіне.

Як паведаміла яе прэс-служба, лідэрка апазіцыі абмяркуе ў ЗША “пытанні, якія маюць крытычна важнае значэнне для бяспекі Украіны, Еўропы і ЗША”, уключна "дамінуючую ролю Расеі ў дачыненні да суседніх дзяржаў", пытанні энергетычнай бяспекі і "прасоўвання Украіны да еўраатлантычнай інтэграцыі".

Напярэдадні візіту ў інтэрв’ю амерыканскім журналістам Цімашэнка заявіла, што "мэта яе візіту ў ЗША – пераканаць амерыканскае кіраўніцтва ў тым, што "памаранчовая каманда", якая паставіла Украіну на празаходнія рэйкі, ізноў аб’ядналася і гатовая стаць у жорсткую апазіцыю да ўрада прэм’ер-міністра Віктара Януковіча".

Амерыканскіх палітыкаў цікавіць перспектыва датэрміновых парламенцкіх выбараў ва Украіне і адстаўкі Віктара Януковіча. Развіццё палітычнага крызісу робіць гэты сцэнар усё больш верагодным, і ў Вашынгтоне, здаецца, гатовыя паставіць на Цімашэнку. ЗША спадзяюцца, што без Януковіча Цімашэнка і Юшчанка хутка прывядуць Украіну ў НАТА, піша РБК daily.

Газета адзначае, што Захад ніколі не спісваў Цімашэнка з рахункаў: падчас крызісаў ва Украіне амбасадары краін G8 (акрамя Расеі) сустракаліся з ёй часцей, чым з прэзідэнтам Віктарам Юшчанкам.

Нагадаем, што 24 лютага Блок Юліі Цімашэнкі і прапрэзідэнцкая партыя “Наша Украіна” падпісалі пагадненне аб стварэнні аб’яднанай апазіцыі. У выніку апазіцыя атрымала ў парламенце каля 200 галасоў з 450, і цяпер кааліцыю Партыі рэгіёнаў, сацыялістаў і камуністаў можна назваць “кіроўнай” толькі з абмоўкамі. Зрэшты, пералом адбыўся яшчэ 5 лютага, калі Цімашэнка прымусіла прыхільнікаў Януковіча прыняць закон аб забароне на адчужэнне галоўнага актыву Украіны – яе газатранспартнай сістэмы.

На думку дэпутата ад БЮТ, палітолага Уладзіміра Палахала, у Вашынгтоне "разумеюць, што сёння ва Украіне без уліку меркавання Юліі Цімашэнка не можа быць прынятае ніводнае сур’ёзнае рашэнне". Ён паведаміў, што "ў ЗША і ЕЗ сур’езна чакаюць датэрміновых выбараў Вярхоўнай рады".

Апазіцыя спадзяецца выкарыстаць незадаволенасць украінцаў якія растуць тарыфамі на ЖКГ і ўвесну адправіць урад у адстаўку. Цімашэнка таксама разлічвае, што прэзідэнт распусціць Вярхоўную раду: у панядзелак Віктар Юшчанка заявіў пра гатоўнасць супрацоўнічаць з апазіцыяй, піша газета.

Януковіч сустракаецца з Меркель, атрымаўшы папярэджанне Юшчанкі, што не мае правы фармуляваць знешнюю палітыку

У гэты час прэм’ер-міністр Украіны Віктар Януковіч у суправаджэнні міністраў адправіўся з аднадзённым візітам у Нямеччыну, дзе возьме ўдзел у цырымоніі падпісання Мемарандума аб намерах паміж Міністэрствам аховы навакольнага прыроднага асяроддзя і Deutsche Bank аб супрацоўніцтве ў сферы змены клімату.

У праграме візіту ўкраінскага прэм’ера запланаваная гадзінныя гутарка з канцлерам ФРГ Ангелай Меркель падчас афіцыйнага абеду. Пасля сустрэчы мяркуюць сумесны падыход канцлера і прэм’ер-міністра да прэсы, прадстаўнікі ўкраінскіх і нямецкіх СМІ здолеюць задаць па два пытанні, паведамляе "Украінская праўда".

Януковіч у Берліне возьме ўдзел у канферэнцыі "Украіна і Еўразвяз: новыя падыходы", дзе таксама запланаваны ўдзел экс-прэзідэнта Польшчы Аляксандра Квасьнеўскага. Мадэратарам канферэнцыі будзе нямецкі палітолаг Аляксандр Рар. Украінскі прэм’ер таксама адкрые сустрэчу ўкраінскіх і нямецкіх бізнэсмэнаў, дзе ён прабудзе 15 хвілін.

Напярэдадні візіту Януковіч заявіў, што Украіна імкнецца да інтэграцыі з ЕЗ, але ў той самы час адзначыў: "Нам трэба таксама стратэгічнае партнёрства з Расеяй, мы мусім развіваць з ёй эканамічныя стасункі. Мы не можам сабе дазволіць ніякай антырасейскай рыторыкі".

Прэзідэнт Украіны Юшчанка ў інтэрв’ю нямецкай дзелавой газеце Financial Times Deutschland, абвінаваціў Еўрапейскі Звяз у недастатковай падтрымцы яго імкнення прывесці Украіну ў ЕЗ і НАТА. Ён падкрэсліў, што менавіта прэзідэнт фармулюе знешнепалітычны курс Украіны: "У Канстытуцыі выразна вызначана: я як прэзідэнт вызначаю знешнюю палітыку".

Прэм’ера ў паездцы суправаджаюць міністр аховы навакольнага прыроднага асяроддзя Васіль Джарты, міністр эканомікі Уладзімір Макуха, намеснік міністра замежных спраў Уладзімір Хандогі, старшыня Камітэта Вярхоўнай рады Украіны па пытаннях нацыянальнай бяспекі Анатоль Кінах.

NEWSru.com