Беларускія цукровыя заводы на мяжы банкруцтва :: Хартыя'97 :: Навiны

Праблема рэалізацыі прадукцыі застаецца вострай для беларускіх вытворцаў цукру, паведамілі “Інтэрфаксу” ў канцэрне “Белдзяржхарчпрам”. “Улічваючы нізкія тэмпы росту паставак цукру на расейскі рынак, вытворцы заклапочаныя пошукам новых каналаў збыту прадукцыі”, – адзначылі ў канцэрне.

У “Белдзяржхарчпраме” ўдакладнілі, што ў Расеі захоўваецца ранейшы парадак ў дачыненні беларускага цукру – прадукцыя ўвозіцца праз адзін склад на Маскоўскай мытні і падвяргаецца суцэльнай выгрузцы для кантролю яе паходжання. Штодня прапускаецца не больш як 6 вагонаў цукру, адзначылі ў канцэрне. За студзень–люты 2007 года ўсяго ў Расею паступіла каля 5 тыс. т беларускага цукру.

Між іншым, у вытворцаў цукру назапасілася даволі вялікая колькасць прадукцыі. У “Белдзяржхарчпраме” ўдакладнілі, што да сярэдзіны лютага ўсе цукровыя заводы завяршылі перапрацоўку цукровага бурака. З ураджаю 2006 года былі перапрацаваныя 3,4 млн. т., што больш як на 13% перавысіла аб’ём 2005 года.

Цяпер беларускія вытворцы вывучаюць рынак Сярэдняй Азіі – Кыргызстан, Казахстан, Узбекістан, Таджыкістан. У канцэрне зазначылі, што ў мінулым годзе ў Кыргызстане было створанае прадпрыемства “Беларуская цукровая кампанія” для рэалізацыі прадукцыі на гэтым рынку.

Па дадзеных статыстыкі, у 2006 годзе ў Беларусі ў агульнай складанасці былі вырабленыя 814 тыс.т. цукру, што на 5,8% менш за аб’ём 2005 года. Пры гэтым з цукровага бурака выраблена каля 350 тыс.т. прадукцыі.