Жана Літвіна: Доступ да інфармацыі закрыюць канчаткова :: Хартыя'97 :: Навiны

“Калі раней доступ да інфармацыі быў абмежаваны да мінімуму, то цяпер ён будзе закрыты канчаткова”, – так пракаментавала БелаПАН старшыня Беларускай асацыяцыі журналістаў (БАЖ) Жана Літвіна ліст урада, адрасаваны ўсім органам дзяржкіравання і дзяржаўным арганізацыям.

Тэкст ліста № 11/810-234-ДСК (ДСК – “для службовага карыстання”) ад 22 лютага 2007 года за подпісам віцэ-прэм’ера Андрэя Кабякова з’явіўся ў інтэрнэце 28 лютага. Ліст адрасаваны рэспубліканскім органам дзяржкіравання, дзяржарганізацыям, аблвыканкамам і Менгарвыканкаму. У ім ідзе гаворка пра тое, як службоўцы павінны працаваць з СМІ. У прэс-службе Савета міністраў інфармацыю наконт дадзенага ліста пакуль не каментуюць.

Між іншым, як вынікае з тэксту, службоўцам рэкамендавана “забяспечыць кантроль за выступамі (інтэрв’ю, артыкулы) супрацоўнікаў органаў дзяржаўнага кіравання ў СМІ, у тым ліку і недзяржаўных друкаваных выданнях”. “Пры выяўленні фактаў неаб’ектыўнага (некарэктнага) асвятлення эканамічных працэсаў” службоўцам неабходна “прыняць меры па прыцягненні зазначаных асоб да дысцыплінарнай адказнасці (аж да звальнення з занятых пасад)”.

У лісце таксама змешчанае патрабаванне забяспечыць нязменны маніторынг матэрыялаў, якія публікуюцца ў СМІ. “У выпадку выяўлення фактаў неаб’ектыўнага асвятлення пытанняў, датычных сферы, якую курыруе Міністэрства, камітэт, канцэрн, выканкам, накіроўвайце адпаведныя прапановы Мінінформу; прымайце меры па давядзенні да грамадскасці аб’ектыўнай інфармацыі, у тым ліку шляхам публікацыі афіцыйных заяў, аспрэчванняў і інш.”, – гаворыцца ў лісце.

Ж.Літвіна ацэньвае гэты дакумент як "вельмі спецыялізаваны", накіраваны ў першую чаргу на кантроль за інфармацыяй эканамічнага характару. "Відаць, гэта азначае, што працэсы, якія ідуць сёння ў эканамічнай сферы, непадкантрольныя. Таму не даць інфармацыю людзям, не даць магчымасці думаць і абмяркоўваць – на сёння галоўнае для органаў дзяржаўнай улады”, – лічыць кіраўнік БАЖ.

"Дакумент у чарговы раз накіраваныя супраць прафесіі журналіста і супраць свабоды слова. Здабываць інфармацыю журналістам будзе вельмі і вельмі складана", – канстатавала Ж.Літвіна.