У Менску апаганены помнік ахвярам Халакосту :: Хартыя'97 :: Навiны

У Менску апаганены помнік брэменскім габрэям – ахвярам Халакосту, што знаходзіцца на тэрыторыі старажытных габрэйскіх могілак на перакрыжаванні вуліц Сухой і Калектарнай. Як паведаміў БелаПАН кіраўнік Сусветнай асацыяцыі беларускіх габрэяў Якаў Гутман, невядомыя абламалі прыкладна адну чвэрць металічнай таблічкі з тэкстам, замацаванай на глыбе граніту.

Я.Гутман пракаментаваў акт вандалізму: “У краіне, дзе на загад службоўцаў знішчаюцца габрэйскія святыні – могілкі і сінагогі, такія факты становяцца звычайнымі”. Ён расцаніў апаганенне памятнага знака, як “своеасаблівае прывітанне ад мясцовых антысемітаў да 65-годдзя трагедыі Менскага гета”, якое будзе адзначацца 2 сакавіка. “Я хацеў бы дажыць да таго дня, калі людзі, якія здзейснілі гэта, сядуць на лаву падсудных і панясуць адказнасць у адпаведнасці з законамі Рэспублікі Беларусь”, – сказаў Я.Гутман.

Памятны знак брэменскім габрэям – частка мемарыяла нямецкім габрэям – ахвярам Халакосту, дэпартаваным з Брэмена, Гамбурга і Дзюсельдорфа ў гады Другой Сусветнай вайны, якія загінулі ў Менску і яго наваколлях. Мемарыял усталяваны нямецкім бокам у канцы 1990-х гадоў.

Нагадаем, што гэтымі днямі ва ўрочышчы Курапаты быў апаганены памятны знак, усталяваны ахвярам сталінізму беларускімі габрэямі ў канцы 2004 года: цяжкім прадметам невядомыя пашкодзілі відарыс зоркі Давыда.