Віктар Івашкевіч: «Лепш бы АГП больш актыўна ўдзельнічала ў падрыхтоўцы Дня волі» :: Хартыя'97 :: Навiны

Радыёстанцыя “Нямецкая хваля” падключылася да абмеркавання ўлётак, якія з’явіліся ў Менску напярэдадні святкавання 25 сакавіка Дня волі. Усё пачалося з таго, што ў Аб’яднанай грамадзянскай партыі (АГП) абурыліся зместам агітацыйных налепак. Яны заклікалі 25 сакавіка прыйсці на Кастрычніцкую плошчу «За свабоду!» і «За Беларусь!». Абуральным для АГП было тое, што Дзень волі зваўся «Днём беларускага адзінства», а побач з бел-чырвона-белым штандарам чырвоназелянеў афіцыйны сцяг краіны. У адказ на гэта кіраўнік аргкамітэта па святкаванні Дня волі, намеснік старшыні партыі БНФ Віктар Івашкевіч у інтэрв’ю “Нямецкай хвалі” адзначыў, што “лепш бы АГП больш актыўна ўдзельнічала ў падрыхтоўцы Дня волі”.

Намеснік старшыні АГП Ігар Шынкарык заявіў, што дадзеныя налепкі – дыскрэдытацыя Дня волі – аднаго з самых знакавых святаў Беларусі.

“Ну, як можна скрыжаваць зялёны лукашысцкі сцяг, калі мы выдатна ведаем гісторыю яго стварэння, калі герб маляваў Сініцын проста на каленах у свой час і крыжаваць вось гэты вось сцяг, выдуманы я не ведаю кім, і гістарычны сцяг? Калі людзі наіўна думаюць, што з Лукашэнкам можна “яднацца”, як яны кажуць, то бок ладзіць дзень яднання і братання, як быў у 1945 годзе на Эльбе, гэтаксама яны думаюць, наладзяць братанне з Лукашэнкам, Паўлючэнкам і іншымі на Свіслачы... Ну, гэта глупства несусветнае!”, – заяўляе Шынкарык.

Андрэй Кусільчук, сябра штаба Аляксандра Мілінкевіча, кажа, што штаб лідэра апазіцыі ніякага дачынення да дадзенай агітпрадукцыі не мае:

“Падрыхтоўку “Дня волі” вядуць, ну я не ведаю, можа пяць груп. Гэта штаб Мілінкевіча, гэта Партыя БНФ, гэта аргкамітэт па падрыхтоўцы “Дня волі” і яшчэ іншыя групы. Кожная група дэцэнтралізавана выпускае сваю прадукцыю і праводзіць працу. І ацэньваць іх мы не маем права, бо мы будуем дэмакратычную дзяржаву, у якой ёсць розныя меркаванні, таму мне складана нешта сказаць з гэтай нагоды. Калі мы да гэтага ніякага дачынення не маем, то мы і не каментуем”.

Кіраўнік аргкамітэта па святкаванню Дня волі намеснік старшыні партыі БНФ Віктар Івашкевіч адзначае, што новая тэма для дыскусій не зробіць апазіцыю мацнейшай. Па словах Івашкевіча, лепш бы АГП больш актыўна ўдзельнічала ў падрыхтоўцы Дня волі:

“Аргкамітэт гэтыя формы не сцвярджаў. Прадукцыя, налепкі там, плакацікі выпускаюцца групай Мілінкевіча. Я не бачу нічога страшнага, ніякіх праблем у такой форме, бо Мілінкевіч заявіў, што для таго, каб прыйсці да дэмакратыі нам трэба весці дыялог з уладай. У гэтым сэнсе вось гэтая сімволіка, што бел-чырвона-белая сімволіка і чырвона-зялёная аб’ядноўваюцца пад еўрапейскім сцягам. Яна мае месца”, – сказаў Івашкевіч “Нямецкай хвалі”.

Кіраўнікі большасці партый, што ўваходзяць у кааліцыю, цяпер знаходзяцца з візітам у ЗША. Аляксандр Мілінкевіч ад гэтай паездкі адмовіўся і праводзіць сустрэчы ў рэгіёнах.