Валеры Леванеўскі: 25 сакавіка ў Менску адбудзецца аднадзённы папераджальны страйк прадпрымальнікаў :: Хартыя'97 :: Навiны

25 сакавіка ў Менску адбудзецца аднадзённы папераджальны страйк прадпрымальнікаў Рэспублікі Беларусь. Пра гэта прэс-цэнтру Хартыі’97 паведаміў вядомы праваабаронца, старшыня Стачкаму прадпрымальнікаў Валеры Леванеўскі. Прадпрымальнікі г.Менска, Менскай вобласці, а таксама з рэгіёнаў разам з дэмакратычнымі сіламі Беларусі плануюць узяць удзел у акцыі 25 сакавіка а 12 гадзіне на плошчы Каліноўскага ў г.Менску з сваімі патрабаваннямі. Прадпрымальнікі мяркуюць, што ў дадзенай акцыі возьме удзел Аляксандр Лукашэнка, які выслухае іх патрабаванні і адкажа на пытанні прадпрымальнікаў.

Прадпрымальнікі не згодныя з пагаршэннем умоў іх дзейнасці, будуць выступаць за адмену апошніх указаў і дэкрэтаў прэзідэнта Рэспублікі Беларусь, якія прывядуць да ліквідацыі дробнага бізнэсу ў Беларусі і далейшага збяднення грамадзянаў.

Адметнай рысай дадзенага страйку і акцыі ў цэлым з’яўляецца тое, што 25.03.2007 шматлікія прадпрымальнікі будуць высоўваць не толькі патрабаванні, звязаныя з іх прадпрымальніцкай дзейнасцю, але і звязаныя з парушэннем правоў грамадзян, у тым ліку:

– на свабоду слова,
– на свабоду сходаў,
– на аб’яднанне ў прафесійныя саюзы і грамадскія арганізацыі.

Прадпрымальнікі выкажуць сваю нязгоду з неабгрунтаваным ростам камунальных плацяжоў і збядненнем насельніцтва.

Адно з асноўных палітычных патрабаванняў прадпрымальнікаў – гэта вызваленне палітвязняў і спыненне ў Беларусі пераследу грамадзянаў па палітычных матывах.