Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Спэктакль пра студэнтаў «паміж Менскам і Вільняй» (Фота) 16:21, 01/03/2007
“Свабодны тэатар” прэзэнтаваў супольны праект са студэнтамі Эўрапейскага гуманітарнага ўнівэрсытэту.Спэктакль “Паміж паміж” рыхтаваўся цягам двух месяцаў студэнтамі ЭГУ пад кіраўніцтвам драматурга Мікалая Халезіна і рэжысэра Ўладзімера Шчэрбаня. Тэма – "стан беларускіх студэнтаў паміж Менскам і Вільняй, між сучаснай Беларусьсю і Эўропай". Прэзэнтацыя мела форму “кватэрніка” – падпольнай імпрэзы ў прыватнай кватэры ў Менску.
Прысутных было ня шмат, бо кватэра ня можа зьмясьціць шмат людзей, але ўсе з захапленьнем глядзяць на дзею.
“Сёньня ўжо здарылася: калі той клюб, дзе мы хацелі адыграць гэтую прэм’еру, там ад ранку былі міліцыянты – ведалі, што будзе “Свабодны тэатар”. І нашы мэнэджэры прайшлі 37 кропак. І ўсюды нам было адмоўлена”, -- тлумачыць “Радыё Свабода” кіраўнік “Свабоднага тэатру” Мікалай Халезін.
Спэктакль поўны рэаліяў жыцьця цяперашніх студэнтаў ЭГУ. Так, на пачатку дзяўчына складае рэчы ў валізку, і сярод іншага ўпотайкі хавае пад майку бел-чырвона-белы сьцяг. Перад ад’ездам у студэнткі адбываецца такі дыялёг з маці:
“– Куды ты едзеш?!”
“– Мама, мы пра гэта з табой ужо размаўлялі”.
“– Навошта ты туды едзеш?”
“– Мама, вучыцца”.
“– Чаму вучыцца? Капіталістам … лізаць?! Нікуды не паедзеш!”
“Мама!..”
Пасьля пільнага допыту на беларускай мытні, студэнты трапляюць у Вільню:
“Vilnius!”, “Laba diena!”
“Вось парадокс: прэм’ера гэтага спэктаклю ў Вільні будзе грацца 6 сакавіка ў тэатры Эймунтаса Някрошуса. Цяжка знайсьці ў Вільні больш прэстыжную пляцоўку”, – патлумачыў Мікалай Халезін.
Кіраўнік “Свабоднага тэатру” падкрэсьлівае, што выступаць прасьцей і часьцей выпадае за мяжой, чым у Беларусі.
