Генеральнага сакратара ААН заклікаюць не пускаць Уладзіміра Навумава ў Нью-Ёрк :: Хартыя'97 :: Навiны

Ліст з просьбай не дапусціць удзелу міністра ўнутраных спраў Беларусі Уладзіміра Навумава ў міжнароднай канферэнцыі ў Нью-Ёрку накіравалі Генеральнаму сакратару ААН Пан Гі Муну ўдовы выкрадзеных у Беларусі апазіцыянераў, лідэры грамадзянскай ініцыятывы “Мы памятаем” Ірына Красоўская і Святлана Завадская, а таксама лідэры партый і грамадскіх арганізацый. Кіраўнік МУС Беларусі Уладзімір Навумаў, падазраваны міжнароднай супольнасцю ў дачыненні да выкраданняў і забойстваў апазіцыянераў, накіраваны Саветам міністраў на канферэнцыю па праблеме гандлю людзьмі, якая павінна прайсці з 4 па 7 сакавіка ў Нью-Ёрку пад эгідай ААН.

У прэс-цэнтр Хартыі’97 паступіў тэкст ліста. Вядома, што яго копіі накіраваныя таксама старшыням Генеральнай Асамблеі ААН і Эканамічнай Рады ААН, а таксама кіраўнікам Упраўлення ААН па наркотыках і злачыннасці і няўрадавай арганізацыі “Vital Voices”, якія мусяць узяць удзел у канферэнцыі па праблеме гандлю людзьмі.

Прыводзім тэкст ліста:

“Паважаны спадар Генеральны Сакратар,

5 сакавіка 2007 года з ініцыятывы Беларусі сумесна з Філіпінамі, Упраўленнем ААН па наркотыках і злачыннасці і амерыканскай няўрадавай арганізацыяй “Vital Voices” у штаб-кватэры ААН у Нью-Ёрку будзе праводзіцца Міжнародная канферэнцыя “Гандаль жанчынамі і дзяўчынкамі: вырашаем праблему разам”.

Мы падтрымліваем імкненні арганізацый ААН па паляпшэнні каардынацыі намаганняў супраць гандлю людзьмі, асабліва жанчын і дзяцей, гэтаксама як і ўзмацненне гендэрнага падыходу ва ўсялякіх акцыях , накіраваных супраць гандлю людзьмі.

Паводле атрыманай інфармацыі на гэтай канферэнцыі ўрад Беларусі будзе прадстаўлены міністрам унутраных спраў спадаром Уладзімірам Навумавым. Паводле дакладу і рэзалюцыі Парламенцкай Асамблеі Рады Еўропы (Дак.10064 ад 24 Лютага 2004) спадар Навумаў падазраецца ў дачыненні да выкраданняў вядомых грамадскіх дзеячаў: экс-міністра ўнутраных спраў Юрыя Захаранкі, віцэ-спікера Віктара Ганчара, бізнэсмэна Анатоля Красоўскага і аператара расейскага тэлебачання Змітра Завадскага.

Міжнародная дэмакратычная грамадскасць глыбока занепакоеная гэтымі знікненнямі. Камісія па правах чалавека ААН у артыкуле 2 рэзалюцыі 2003/14, ухваленай 17 красавіка 2003 г., і Парламенцкая Асамблея Рады Еўропы ў рэзалюцыі 1371 (2004) заклікае ўрад Беларусі правесці рэальнае незалежнае расследаванне па вышэйназваных знікненнях і інфармаваць сем’і выкрадзеных людзей аб працэсе і выніках расследавання.

ААН і ПАРЕ таксама заклікалі беларускі ўрад звольніць або зняць з пасады тых службовых асоб, якія датычныя да гвалтоўных знікненняў і/або пазасудовых пакаранняў смерцю, да бесстаронняга, аўтарытэтнага і поўнага расследавання па гэтых пэўных выпадках і забяспечыць усе неабходныя меры, каб цалкам расследаваць усе выпадкі гвалтоўных знікненняў, пазасудовых пакаранняў смерцю і катаванняў, а вінаватых прывесці да адказнасці перад незалежным трыбуналам, і калі яны будуць прызнаныя вінаватымі, то пакараць у адпаведнасці з міжнароднымі абавязальніцтвамі па правах чалавека, якія Беларусь узяла на сябе.

На жаль, беларускія ўлады ігнаруюць гэтыя заклікі, што прывяло Еўрапейскі Звяз і Злучаныя Штаты Амерыкі да абмежавання допуску на іх тэрыторыі тых, хто адзначаны ў дакладзе ПАРЕ як ключавыя фігуры, задзейнічаныя ў выкраданнях, таксама як і тых, хто найперш з’яўляецца адказнымі за ўтойванне злачынстваў і неправядзенне расследаванняў. Спадар Навумаў з’яўляецца адным з тых асоб, на якія распаўсюджваецца забарона на ўезд у краіны Еўразвяза і ЗША,

Мы хацелі б звярнуцца да параграфа 1 артыкула 1 Дэкларацыі ААН 1992 года аб абароне усіх людзей ад гвалтоўных знікненняў, у якім гаворыцца, што “любы акт гвалтоўнага знікнення з’яўляецца абразай чалавечай годнасці . Ён асуджаецца як адмаўленне мэт Статуту ААН і як сур’ёзнае абуральнае парушэнне правоў чалавека і асноўных свабодаў, абвешчаных ва Усеагульнай дэкларацыі правоў чалавека”, а таксама да параграфа 6 артыкулы 1 дэкларацыі, які гаворыць, што расследаванне павінна працягвацца датуль, пакуль лёс ахвяр гвалтоўных знікненняў не будзе высветленая.

Ваша правасхадзіцельства, мы лічым удзел спадара Навумава ў міжнароднай канферэнцыі пад заступніцтвам ААН як парушэнне літары і духу канвенцый ААН. Мы, ніжэйпадпісаныя прадстаўнікі беларускай дэмакратычнай апазіцыі, заклікаем вас распачаць адпаведныя крокі, каб не дапусціць удзелу спадара Навумава ў канферэнцыі “Гандаль жанчынамі і дзяўчынкамі: вырашым праблему разам”, якая адбудзецца ў Нью-Ёрку 5 Сакавіка 2007 года.

Мы верым, што толькі тады, калі Беларусь вернецца ў супольнасць дэмакратычных нацый, удзел вышэйшых службовых асоб у такіх міжнародных падзеях будзе значным і канструктыўным.

З павагай,

Ірына Красоўская і Святлана Завадская, лідэры грамадзянскай ініцыятывы “Мы памятаем”

Аляксандр Мілінкевіч, лідэр аб’яднаных дэмакратычных сілаў Беларусі, экс-кандыдат на пасаду прэзідэнта Беларусі

Вінцук Вячорка, лідэр Беларускага народнага фронту

Анатоль Лябедзька, старшыня Аб’яднанай грамадзянскай партыі

Сяргей Калякін, першы сакратар Партыі камуністаў беларускай

Ірына Казуліна , жонка палітвязня Аляксандра Казуліна, экс-кандыдата на пост прэзідэнта Беларусі

Сяргей Мацкевіч, старшыня працоўнай групы асамблеі няўрадавых арганізацый

Сяргей Бахун, сустаршыня моладзевага грамадскага аб’яднання «Малады Фронт»

Іна Кулей, старшыня камітэта абароны рэпрэсаваных «Салідарнасць».