У Кіеве пікетавалі беларускую амбасаду :: Хартыя'97 :: Навiны

2 сакавіка ля амбасады Рэспублікі Беларусь у Кіеве адбыўся пікет беларускіх жанчын, чые сваякі асуджаныя ў Беларусі па крымінальных, грамадзянскіх і маёмасных справах. Нягледзячы на моцны дождж, восем беларусак разгарнулі плакаты з патрабаваннямі адстаўкі генеральнага пракурора і старшыні Вярхоўнага суду Беларусі, а таксама з лозунгам “Улада – гэта народ, а не службоўцы”.

Прэс-сакратар Аб’яднанай грамадзянскай партыі Кацярына Ткачэнка, якая суправаджае пікетчыц з Менску, заявіла БелаПАН, што акцыя не носіць палітычнага характару. “Жанчыны прыехалі на ўласную ініцыятыву. Беларускі не могуць дамагчыся справядлівасці ў сваёй краіне. Яны хочуць законных, абгрунтаваных, матываваных судовых рашэнняў па справах сваіх блізкіх. З прычыны таго, што ў Менску правесці пікет ім не дазволілі, яны спрабуюць прыцягнуць увагу грамадскасці ў Кіеве”, – паведаміла прэс-сакратарка.

На пытанне, якога выніку чакаюць пікетчыцы ад гэтай акцыі, К.Ткачэнка паведаміла, што яны маюць намер перадаць у беларускую амбасаду зварот да Аляксандра Лукашэнкі. “Там пералічаныя ўсё парушэнні і нестасоўкі, дапушчаныя падчас расследаванняў і судоў па справах родных і блізкіх гэтых жанчын. Ім больш няма куды звяртацца. На свае скаргі ў розныя беларускія інстанцыі яны атрымоўваюць толькі фармальныя адпіскі. Магчыма, напярэдадні прыезду Аляксандра Лукашэнкі ў Кіеў на іх звернуць увагу і прымуць у Адміністрацыі беларускага прэзідэнта”, – сказала прэс-сакратарка партыі.