Лукашэнка: «Мы гатовыя весці палітычны дыялог» :: Хартыя'97 :: Навiны

“Мы рады эканамічнаму супрацоўніцтву з Еўропай і гатовыя весці палітычны дыялог для пашырэння эканамічнага супрацоўніцтва” , – заявіў учора Аляксандр Лукашэнка ў інтэрв’ю тэлеканалу Al Jazeera. “Беларусь шмат значыць у гарантаванні энергетычнай бяспекі Еўропы. Без Беларусі ў Еўропе спакойна не будзе. Еўропа зразумела, што калі нестабільна будзе ў Беларусі, то нестабільна будзе і ў Еўропе, – мяркуе Лукашэнка. – Нам трэба спыніць глядзець адзін на аднаго цераз плот”.

Пра стасункі з ЗША

Гаворачы пра ўзаеміны з ЗША, Лукашэнка прызнаў, што “мяч на іх боку”.

“Калі амерыканцы лічаць неабходным усталяваць нармальныя стасункі з Беларуссю, то мы да гэтага гатовыя. Мы гатовыя абмяркоўваць любыя ініцыятывы, любыя ўмовы, але яны павінны быць прымальнымі і ўлічваць беларускія інтарэсы. І ні ў якім разе не высоўваць абсурдныя ўмовы, на якія мы, вядома, не пойдзем” , – папярэдзіў Лукашэнка.

Размяшчэнне ля меж Беларусі элементаў амерыканскай сістэмы СРА ён назваў “толькі пачаткам” нарошчвання вайсковага патэнцыялу НАТА на ўсходнім напрамку.

“Аснова нашай палітыкі – добрасуседскія стасункі з тымі, хто нас акружае. У нас ёсць што прапанаваць свету, і мы ідзем туды, дзе нас чакаюць і прымаюць”, – сказаў ён.

Пра стасункі з Расеяй

Каментуючы сённяшнюю сітуацыю ў стасунках з Расеяй, Лукашэнка заявіў, што “мы не здрадзім расейцам”.

“Якія бы стасункі ні склаліся на сёння з расейскім кіраўніцтвам, мы не здрадзім расейцам. Падабаецца гэта камусьці ці не, на Захадзе павінны разумець, што вышэй за ўсё – наша сяброўства з расейцамі. Мы на святым іграць не будзем… Трэба пераходзіць ад палітыкі шантажу да нармальнага дыялогу. Не мы першапрычына таго, што адбылося ў стасунках з Расейскай Федэрацыяй. Калі яны хочуць будаваць з намі саюз на раўнапраўнай сяброўскай, брацкай аснове, мы да гэтага гатовыя”, – не стаў утойваць Лукашэнка свайго жадання наладзіць кантакт з Масквой.