Лукашэнка сустрэўся з прэзідэнтам Аб’яднаных Арабскіх Эміратаў :: Хартыя'97 :: Навiны

У гатэлі “Эмірэйтс Пэлас” у Абу-Дабі завяршылася сустрэча Аляксандра Лукашэнкі з прэзідэнтам Аб’яднаных Арабскіх Эміратаў, кіраўніком эмірата Абу-Дабі шэйхам Халіфа Бэн Заід Аль-Нахаян. Паводле паведамлення карэспандэнта “Інтэрфакса”, кіраўнікі дзяржаў абмеркавалі пытанні пашырэння гандлёва-эканамічнага супрацоўніцтва, а таксама шырокі спектр пытанняў міжнароднага парадку дня.

“Мы гатовыя зрабіць усё, каб Аб’яднаныя Арабскія Эміраты маглі актыўна прысутнічаць у Еўропе”, – заявіў на сустрэчы А.Лукашэнка. Ён таксама адзначыў, што “ў нас ёсць пэўныя прапановы ў сферы інвестыцыйнага супрацоўніцтва”.

У сваю чаргу Халіф Бэн Заід Аль-Нахаян выказаў гатоўнасць да супрацоўніцтва з Беларуссю ва ўсіх сферах.

Гатэль “Эмірэйтс Пэлас”, які знаходзіцца на беразе Арабскага заліва, з’яўляецца адным з самых раскошных гасцініц у ААЭ, займае тэрыторыю 200 тыс. кв.м. Гатэль будаваўся з разлікам на правядзенне самітаў арабскіх дзяржаў Заліва – некалькі паверхаў спецыяльна прызначаныя для размяшчэння кіраўнікоў дзяржаў і закрытыя для публікі.

Кіраўнік Беларусі знаходзіцца з візітам у Аб’яднаных Арабскіх Эміратах з 4 сакавіка.

Падчас візіту таксама запланаваныя сустрэчы з віцэ-прэзідэнтам, прэм’ер-міністрам, міністрам абароны ААЭ і кіраўніком Эмірата Дубаі шэйхам Махамедам Бэн Рашыд Аль-Мактумам, а таксама спадчынным прынцам Эмірата Абу-Дабі намеснікам Вярхоўнага галоўнакамандуючага ўзброенымі сіламі ААЭ шэйхам Мухамедам Бэн Заід Аль-Нахаянам.

Падчас візіту ў ААЭ плануецца падпісаць шэраг міжурадавых пагадненняў, у прыватнасці, аб супрацоўніцтве ў галіне сродкаў масавай інфармацыі, аб паветраным паведамленні, аб узаемаразуменні і супрацоўніцтве ў сферы бяспекі.

Шэраг сябраў беларускай дэлегацыі ў цяпер праводзяць сустрэчы з сваімі калегамі. Міністр замежных спраў Беларусі Сяргей Мартынаў праводзіць перамовы з дзяржаўным міністрам па замежных справах Махамедам Хусейнам Аль Шаалі, міністр інфармацыі Беларусі Уладзімір Русакевіч – з дзяржаўным міністрам па справах Кабінета міністраў – намеснікам старшыні Нацыянальнага савета па інфармацыі Махамедам Абдалой Аль Гарунам.

Мяркуюць, што ў панядзелак увечары Аляксандр Лукашэнка наведае Эмірат Дубай, дзе правядзе перамовы з віцэ-прэзідэнтам, прэм’ер-міністрам, міністрам абароны ААЭ, кіраўніком Эмірата Дубай шэйхам Махамедам Бэн Рашыд Аль-Мактумам.

Як паведамілі ў прэзідэнцкай прэс-службе, ААЭ з’яўляюцца асноўным гандлёвым партнёрам Беларусі сярод арабскіх дзяржаў Персідскага заліва.

У 2006 годзе аб’ём экспарту Беларусі ў ААЭ склаў 24,3 млн. даляраў, рост больш як у 5 разоў у параўнанні з 2005 годам.

Прырост экспарту дасягнуць за кошт паставак цягачоў і спецыяльнай прычапной аўтатэхнікі прадпрыемства МЗКТ, а таксама падшыпнікаў, шын і шкловалакна.

У Менску лічаць, што існуе магчымасць далейшага прасоўвання аўтамабільнай тэхнікі, абсталявання для нафтахімічнай галіны, іншага абсталявання, а таксама мэблі, шклотканін для экспарту ў іншыя краіны Азіі і Афрыкі праз свабодныя зоны ААЭ, адзначылі ў прэс-службе кіраўніка Беларусі.

У інвестыцыйнай сферы найбольш перспектыўным выглядае прыцягненне прыватных інвестыцый у сферы турызму і нерухомасці Беларусі для рэалізацыі праектаў у гасцінічнай і будаўнічай галінах, дадалі ў прэс-службе.