Мілінкевіч удзельнічае ў кампаніі «За свабоднае развіццё прадпрымальніцтва» :: Хартыя'97 :: Навiны

Аляксандр Мілінкевіч узяў удзел ва ўстаноўчай канферэнцыі кампаніі "За свабоднае развіццё прадпрымальніцтва", якая праходзіць сёння ў Мінску. Лідэр дэмакратычных сіл Беларусі заклікаў прадпрымальнікаў да еднасці з палітычнымі сіламі апазіцыі і прапанаваў супольны ўдзел у мерапрыемствах 25 сакавіка.

Выступаючы на ўстаноўчай канферэнцыі, Аляксандр Мілінкевіч казаў пра ролю прадпрымальніцкага руху ў зменах у Беларусі. “Прадпрымальнікі ў любой краіне – гэта адныя з самых актыўных грамадзянаў, якія першымі адчуваюць неабходнасць пераменаў. Беларусь тут вельмі красамоўны прыклад. Прадпрымальнікі і моладзь -- гэта, несумненна, рухавік пераменаў у нашай краіне.”

Разам з тым, Аляксандр Мілінкевіч заклікаў прадпрымальнікаў пазбавіцца ілюзіяў і не спадзявацца, што раптам наступіць доўгачаканае пацяпленне ў стаўленні ўлады да бізнеса. “Сённяшняе кіраўніцтва Беларусі непадрыхтаванае да зменаў і баіцца іх. Час адкінуць ілюзіі – улада стварае манаполію на ўсё: на думкі, на дзейнасць, на бізнес”.

У канферэнцыі бяруць удзел каля 100 актывістаў прадпрымальніцкага руху. Як паведаміў БелаПАН сябра палітрады Аб`яднанай грамадзянскай партыі, каардынатар кампаніі Віктар Гарбачоў, канферэнцыя завяршае распачатае летам 2006 года стварэнне новага грамадскага аб`яднання беларускіх прадпрымальнікаў.

Аляксандр Мілінкевіч заклікаў прадпрымальнікаў актыўна далучацца да палітычнай дзейнасці і ўзяць удзел у мерапрыемствах 25 сакавіка.