Забойцы Ганны Паліткоўскай планавалі расправу і над іншымі журналістамі :: Хартыя'97 :: Навiны

Падчас журналісцкага расследавання забойства аглядальніка “Новой газеты” Ганны Паліткоўскай карэспандэнты “Новой газеты” даведваюцца пра ўсё новыя і новыя факты і абставіны, звязаныя непасрэдна з яе гібеллю і з падрыхтоўкай да гэтай расправы.

У інтарэсах следства журналісты пакуль не могуць паведаміць пра большасць з гэтых фактаў, але ёсць рэчы, замоўчваць якія журналісты не маюць намеру. Бо яны тычацца жыцця і здароўя іншых людзей, у тым ліку і іх калегаў-журналістаў. У прыватнасці, вядома, што рыхтавалася расправа і над журналістам “Московского комсомольца” Вадзімам Рачкалавым. Атрымаўшы і праверыўшы гэтыя звесткі, журналісты “Новой” адразу папярэдзілі самога Вадзіма і праваахоўныя органы.

“Спадарам заказчыкам хочам нагадаць: даводзячы да чытачоў якія-небудзь факты, журналіст мае права выказаць і сваю пазіцыю. Безумоўна, нешта можа не спадабацца тым, каго закранула публікацыя. Заўсёды ёсць выхад: паразумецца з журналістам і яго рэдакцыяй, выказаць аргументы; урэшце, высветліць стасункі ў судзе. Так паступаюць цывілізаваныя людзі.

Але ўсё часцей і часцей журналісты, якія пішуць пра расследаванні, сутыкаюцца з пагрозамі. А калі яны не дзейнічаюць і журналіст працягвае выконваць свой доўг, то пагрозы ўвасабляюцца. Не ў жыццё, а ў смерць.

Журналісты “Новой газеты” ведаюць гэта вельмі добра: Ігар Домнікаў, Юры Шчэкачыхін, Ганна Політкоўская… І мы свой выбар зрабілі. Так, нам увесь час пагражаюць, але мы будзем працягваць журналісцкія расследаванні, у тым ліку ўсіх абставінаў, звязаных з забойствамі нашых таварышаў. Нам будзе пра што распавесці чытачам”, – гаворыцца ў звароце, апублікаваным на сайце “Новой газеты”.