У Вашынгтоне прэзентаваная стратэгія аб’яднаных дэмакратычных сілаў Беларусі :: Хартыя'97 :: Навiны

4 сакавіка завяршылася паездка ў ЗША дэлегацыі прадстаўнікоў дэмакратычных сілаў Беларусі. У склад дэлегацыі ўваходзілі лідэры Аб’яднанай грамадзянскай партыі (АГП) Анатоль Лябедзька, Партыі камуністаў Беларускай Сяргей Калякін, Партыі БНФ Вінцук Вячорка. Жонка старшыні Беларускай сацыял-дэмакратычнай партыі “Грамада” Ірына Казуліна і кіраўнік працоўнай групы Асамблеі недзяржаўных арганізацый Беларусі Сяргей Мацкевіч. Яны знаходзяцца ў ЗША з 27 лютага.

2 сакавіка ў Вашынгтоне адбылася сустрэча беларускай дэлегацыі з прадстаўнікамі Міністэрстваў замежных спраў 9 еўрапейскіх краін, у тым ліку Даніі, Нарвегіі, Ісландыі, прыбалтыйскіх і іншых дзяржаў Паўночнай Еўропы. Сустрэча адбылася з удзелам намесніка памочніка дзяржсакратара ЗША Дэвіда Крамера. Беларускія палітыкі распавялі пра палітычную сітуацыю ў рэспубліцы, а таксама прэзентавалі стратэгію аб’яднаных дэмакратычных сіл.

“Да нас было вельмі шмат пэўных пытанняў, – прыводзіць прэс-служба АГП словы А.Лябедзькі. – Гэта сведчыць пра тое, што ў Міністэрствах замежных спраў краін Паўночнай Еўропы нядрэнна арыентуюцца не толькі ў агульнай сітуацыі, але і ў нюансах таго, што адбываецца сёння ў Беларусі”.

Па словах лідэра АГП, прадстаўнікоў знешнепалітычных ведамстваў цікавіла пытанне: што можа зрабіць Еўропа для змянення сітуацыі ў Беларусі. “У сувязі з гэтым мы выказалі крытычны погляд на пазіцыю афіцыйнага Брусэля, у якога дагэтуль няма выразнай стратэгіі і плану дзеянняў у дачыненні Беларусі. Пры гэтым аддалі належнае таму, што быў выпрацаваны дакумент з прапановамі Еўрапейскага Звяза для Беларусі і яе грамадзянаў”, – сказаў А.Лябедзька.

Прадстаўнікі беларускіх дэмсілаў выступілі на паседжанні круглага стала з удзелам больш як паўсотні супрацоўнікаў амерыканскіх дзяржструктур, НДА і СМІ. “Яны выявілі вялікі і непадробны інтарэс да Беларусі і да падзей у нашай краіне”, – адзначыў лідэр АГП.

Як паведамляў БелаПАН, раней падчас паездак беларускія палітыкі сустрэліся з шэрагам кангрэсменаў ЗША. У прыватнасці, на сустрэчы з кіраўніком Хельсінкскага камітэта Кангрэса ЗША Элсі Хасцінгам абмяркоўвалася магчымасць арганізацыі ў Кангрэсе слуханняў па праблеме палітвязняў у Беларусі. Беларуская дэлегацыя таксама сустрэлася з намеснікам дзяржсакратара ЗША па краінах Еўропы і Азіі Дэніэлам Фрыдам.