Нідэрландскія праваабаронцы занепакоеныя ўдзелам Навумава і Пяткевіч у Канферэнцыі ААН :: Хартыя'97 :: Навiны

Нідэрландская арганізацыя Mission to Minsk звярнулася да міністра замежных спраў Нідэрландаў з заявай у сувязі з удзелам у канферэнцыі ў рамках ААН у Нью-Ёрку міністра ўнутраных спраў Беларусі Уладзіміра Навумава, падазраванага міжнароднай супольнасцю ў дачыненні да гвалтоўных знікненняў у Беларусі, і намесніка кіраўніка Адміністрацыі прэзідэнта Беларусі Наталлі Пяткевіч.

“Mission To Minsk выказвае сваю заклапочанасць тым фактам, што рэжым, адказны за гвалтоўныя знікненні ў сваёй краіне, з’яўляецца арганізатарам канферэнцыі ААН па прадухіленні гандлю жанчынамі, якая адбудзецца 5 сакавіка ў Нью-Ёрку, – гаворыцца ў заяве. – Беларусь, краіна, якая адкрыта парушае права чалавека, не павінна мець права голасу на такіх мерапрыемствах Уладзіміру Навумаву, міністру ўнутраных спраў Беларусі, і Наталлі Пяткевіч, намесніку кіраўніка Адміністрацыі прэзідэнта Рэспублікі Беларусь, афіцыйна забаронены ўезд на тэрыторыю краін Еўрапейскага Звяза і ЗША. Гэтыя людзі нясуць прамую адказнасць за грубае парушэнне правоў чалавека ў Беларусі. 22 лістапада 2006 года Арганізацыя Аб’яднаных Нацый прыняла чарговую рэзалюцыю па Беларусі, у якой запатрабавала ад беларускага ўрада неадкладнага расследавання спраў гвалтоўных знікненняў Юрыя Захаранкі, Віктара Ганчара, Анатоля Красоўскага, Змітра Завадскага. Рэзалюцыі, якія змяшчаюць гэтае патрабаванне, прымаюцца ААН з 2000 года. Дагэтуль урад Беларусі ніяк на іх не адрэагаваў”.

Mission To Minsk заклікае ўсіх удзельнікаў канферэнцыі выказаць сваю заклапочанасць удзелам У. Навумава і Н. Пяткевіч у дадзенай канферэнцыі.

Арганізацыя заклікае міністра замежных спраў Нідэрландаў Махіма Верхагена публічна выказаць сваю заклапочанасць тым фактам, што Беларусь адпраўляе на канферэнцыю ААН тых, хто лічыцца міжнароднай супольнасцю грубымі парушальнікам правоў чалавека.