Еўракамісія сумняваецца, што Расея ўступіць у СГА да канца 2007 года :: Хартыя'97 :: Навiны

Кіраўнік прадстаўніцтва Еўракамісіі ў РФ Марк Франка сумняваецца, што ў Расеі атрымаецца стаць сябрам СГА да канца 2007 года. Пра гэта еўрапейскі службоўца заявіў у інтэрв’ю газеце “Коммерсант”. Расея не дэманструе пэўных крокаў, якія маглі б спрыяць паспяховаму завяршэнню шматбаковых перамоваў, лічаць у Брусэлі. Між іншым, ужо прынятыя абавязальніцтвы, на ацэнку расейскага ўрада, могуць прывесці да страты 110 млрд. рублёў імпартных пошлін да 2010 года.

“Мы шмат чулі ад сваіх расейскіх партнёраў пра тое, што далучэнне да СГА з’яўляецца прыярытэтам Расеі і мэта – стаць сябрам арганізацыі да канца 2007 года. Але тое, як ідуць перамовы, і нізкія тэмпы выканання двухбаковых абавязальніцтваў выклікаюць сумненні ў тым, што Расея стане сябрам СГА да канца 2007 года”, – заявіў Франка.

Па яго словах, “як і ў выпадку выканання двухбаковых абавязальніцтваў, Расея павінна надаць імпульс шматбаковым перамовам і выступіць з больш пэўнымі і выразнымі прапановамі”. “Для ЕЗ вельмі важна, каб Расея стала сябрам СГА, і мы зробім усё, што ад нас залежыць”, – дадаў ён.

Франка паведаміў, што камісар ЕЗ па пытаннях гандлю Піцер Мандэльсан прыедзе ў Маскву ў канцы сакавіка, каб абмеркаваць пытанні, звязаныя з далучэннем Расеі да СГА і магчымыя шляхі ўзаемадзеяння з міністрам эканамічнага развіцця і гандлю РФ Германам Грэфам і іншымі сябрамі ўрада.

Пры гэтым кіраўнік прадстаўніцтва Еўракамісіі ў РФ адзначыў, што двухбаковыя дамоўленасці з ЕЗ пераглядацца не будуць. “Але ў дачыненні шматбаковых перамоваў ёсць дастаткова выразныя патрабаванні. Калі Расея будзе чакаць яшчэ паўгода, перш чым пачаць дзейнічаць, то, хутчэй за ўсё, нічога не адбудзецца, бо пачнуцца парламенцкія выбары. Далучэнне да СГА – гэта як марафон. Расея прабегла асноўную дыстанцыю, забегла на стадыён... Застаўся апошні круг, і невядома, колькі часу на яго спатрэбіцца”, – сказаў ён.

Між іншым, як паведаміў кіраўнік Федэральнай мытнай службы Андрэй Бельянінаў, згодна з абавязальніцтвамі, якія прымае Расея пры ўступе ў СГА, да 2010 году сярэднеўзважаная стаўка мытнага тарыфу знізіцца з 12,9% да 11,5%. У тым ліку па сельгаставарах – з 18,6% да 18%; па прамтаварах – з 10% да 7,6%. Іншымі словамі, стаўкі ўвазных мытных пошлін цягам 2008–2010 гадоў будуць паніжаныя прыкладна на 11%.

Кіраўнік Мінфіна Аляксей Кудрын ужо палічыў, колькі гэта будзе каштаваць. На паседжанні ўрада ён заявіў, што “ўдакладненне ставак” прыводзіць да страты каля 40 млрд. рублёў у 2008 годзе і 110 млрд. рублёў – да 2010-га.

Па дадзеных ФТС, аб’ём мытных плацяжоў пры ўвозе тавараў у 2006 годзе склаў 947,4 млрд. рублёў. А ўсяго ФТС забяспечвае ледзь менш за палову прыбыткаў федэральнага бюджэту. У 2007 годзе мытня павінна пералічыць 3124 млрд. рублёў, з іх 1083 млрд. рублёў – за кошт пошлін на імпарт.

NEWSru.com