Лукашэнка збіраецца пабудаваць у Беларусі сталіцу арабскіх эміраў :: Хартыя'97 :: Навiны

Беларусь і Аб’яднаныя Арабскія Эміраты (ААЭ) разглядаюць магчымасць будаўніцтва каля аднаго з беларускіх нацыянальных паркаў цэлага турыстычнага горада. Пра гэта, як піша ў аўторак Telegraf.by, заявіў Аляксандр Лукашэнка па выніках візіту ў ААЭ.

“Вельмі цікавая тэма турызму. Я прапанаваў пабудаваць у Беларусі своеасаблівы Абу-Дабі. Мы гатовыя даць зямлю, магчыма, дзесьці каля нашых нацыянальных паркаў. Эмірацкі бок вельмі зацікавіўся гэтай прапановай”, – паінфармаваў прэзідэнт.

Ён таксама распавёў, што дзве краіны дамовіліся стварыць міждзяржаўную камісію па супрацоўніцтве. “Праз 60 дзён наследны прынц прыедзе ў Менск, дзе мяркуецца падпісанне адразу некалькіх пагадненняў аб супрацоўніцтве ў розных сферах. Створаная міждзяржаўная камісія, якую з беларускага боку ўзначальвае дзяржсакратар Савета бяспекі Віктар Шэйман”, – паведаміў Лукашэнка. Па яго словах, па выніках візіту ў ААЭ “ўжо бачныя некалькі буйных праектаў агульным коштам прыкладна ў 100 мільёнаў даляраў”.

Раней паведамлялася, што ў рамках візіту Лукашэнкі сябры беларускай урадавай дэлегацыі падпісалі з сваімі калегамі з ААЭ міжурадавыя пагадненні аб супрацоўніцтве ў сферы сродкаў масавай інфармацыі, аб паветраным паведамленні, аб ўзаемаразуменні і супрацоўніцтве ў сферы бяспекі, аб вайскова-тэхнічным супрацоўніцтве і аб супрацоўніцтве паміж Беларускім дзяржаўным універсітэтам і Універсітэтам ААЭ.