Навіцкі прызнаў, што ў Беларусі ёсць палітвязні :: Хартыя'97 :: Навiны

Дакладчык Парламенцкай Асамблеі Рады Еўропы (ПАРЕ) італьянскі дэпутат Андрэа Рыгоні плануе наведаць Менск у сярэдзіне траўня гэтага года. Як паведаміў БелаПАН супрацоўнік інфармацыйнай службы Рады Еўропы Раберта Тумбарэла, дамоўленасць пра гэта была дасягнутая 2 сакавіка падчас сустрэчы еўрапейскага палітыка з старшынёй “савета рэспублікі” “нацыянальнага сходу” Беларусі Генадзем Навіцкім у Рыме. “Навіцкі падкрэсліў, што цяпер палітычных зняволеных у краіне можна пералічыць па пальцах”, – сказаў Р.Тумбарэла.

Р.Тумбарэла быў упаўнаважаны А.Рыгоні паінфармаваць пра гутарку дэпутата з спікерам верхняй палаты беларускага парламента.

Па словах Р.Тумбарэлы, падчас сустрэчы абмяркоўвалася магчымасць для беларускага парламента зноў атрымаць статус спецыяльна запрошанага ў ПАРЕ і магчымасць уступлення Беларусі ў Раду Еўропы. “Андрэа Рыгоні падкрэсліў, што для гэтага Беларусі неабходна паважаць і выконваць правы чалавека і ўвесці мараторый на пакаранне смерцю, – распавёў Р.Тумбарэла. – Спадар Рыгоні таксама заклікаў вызваліць усіх палітычных зняволеных у вашай краіне”.

У сваю чаргу Г.Навіцкі адзначыў, што беларускі ўрад плануе ўвесці мараторый на пакаранне смерцю. “Навіцкі таксама падкрэсліў, што цяпер палітычных зняволеных у краіне можна пералічыць па пальцах”, – сказаў Р.Тумбарэла.

Нагадаем, што ў Беларусі цяпер асуджаныя па палітычных матывах экс-кандыдат у прэзідэнты Беларусі Аляксандр Казулін, старшыня Беларускай сацыял-дэмакратычнай партыі (Народная Грамада), каардынатар Еўрапейскай кааліцыі Мікалай Статкевіч, моладзевыя лідэры Зміцер Дашкевіч, Павал Севярынец, Артур Фінькевіч, праваабаронца Кацярына Садоўская, лідэры прадпрымальнікаў Мікалай Аўтуховіч і Юры Лявонаў. У следчым ізалятары ў Віцебску ўжо тры тыдні знаходзіцца моладзевы актывіст Дзяніс Дзянісаў.