Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
У магілу экс-дыктатара Югаславіі ўваткнулі кол 11:45, 06/03/2007
Над магілай былога прэзідэнта Югаславіі Слабадана Мілошавіча ў сербскім горадзе Пажаравац праведзены рытуал выгнання злых духаў.
Як паведамілі ў панядзелак сербскія СМІ, былы актывіст апазіцыйнага руху “Отпор” і цёзка па прозвішчу экс-прэзідэнта Міраслаў Мілошавіч пераскокнуў праз магільны плот і ўваткнуў у надмагільны помнік драўляны кол – гэтак у сярэдневяковай Сербіі рабілі з магіламі вампіраў.
Арганізатар акцыі распавёў, што першапачаткова сваю “імпрэзу” ён планаваў разыграць 11 сакавіка – у дзень першых угодак Мілошавіча, – але вырашыў яго перанесці, каб пазбегнуць канфліктаў з прыхільнікамі экс-дыктатара, якія прыйдуць наведаць магілу.
Па словах Міраслава Мілошавіча, ён патэлефанаваў у паліцыю, каб прызнацца ў здзейсненым , аднак “яны не надалі гэтаму ніякай увагі”.
Слабадан Мілошавіч, які ўзначальваў Рэспубліку Сербія ў 1989–1997 гады і Саюзную рэспубліку Югаславія ў 1997–2000 гадах, сканаў 11 сакавіка 2006 года ў турэмнай камеры Гаагскага трыбунала. Высунутыя супраць яго Міжнародным трыбуналам па былой Югаславіі абвінавачванні складаліся з 66 пунктаў, сярод іх здзейсненыя падчас балканскіх канфліктаў вайсковыя злачынствы і злачынствы супраць чалавечнасці.
