Пяткевіч: Канвенцыя аб гвалтоўных знікненнях для Беларусі не актуальная :: Хартыя'97 :: Навiны

Пра гэта намесніца кіраўніка Адміністрацыі прэзідэнта Беларусі Наталля Пяткевіч заявіла на прэс-канферэнцыі ў штаб-кватэры ААН. Паводле Наталлі Пяткевіч, МЗС Беларусі не будзе надаваць статус першачарговасці гэтай канвенцыі ААН. Канвенцыя ААН аб гвалтоўных знікненнях была прынятая Генасамблеяй ААН у 2006 годзе.

“Для Беларусі гэтая канвенцыя не актуальная, яна для нас іграе такое самае значэнне, як ахова азонавага слою альбо абарона галадаючых. У нас такой праблемы няма”, – заявіла Наталля Пяткевіч. Цяпер намесніца кіраўніка Адміністрацыі прэзідэнта Наталля Пяткевіч і міністр унутраных спраў Уладзімір Навумаў прадстаўляюць Беларусь на міжнароднай канферэнцыі па праблемах гандлю людзьмі, якая праходзіць у штаб-кватэры ААН.

Як адзначае РІА “Новости”, Канвенцыя аб гвалтоўных знікненнях была распрацаваная з актыўным удзелам Расеі. Вярхоўны камісар ААН Луіза Арбур назвала дадзены дакумент адным з галоўных дасягненняў года ў сферы абароны правоў і свабодаў.

У ААН плануюць стварыць спецыяльны камітэт па гвалтоўных знікненнях, які будзе разглядаць даклады краін-удзельніц і скаргі прыватных асоб. Больш таго, дзяржавы, якія ратыфікуюць канвенцыю, будуць здаваць справаздачу камітэту пра яе выкананне. Канвенцыя была ўхваленая Генасамблеяй ААН у снежні 2006 года.

Гвалтоўныя знікненні, як адзначаецца ў канвенцыі, могуць прызнавацца злачынствам супраць чалавечнасці і падпадаць пад юрысдыкцыю Міжнароднага крымінальнага суду. Між іншым, Генасамблея ААН у лістападзе 2006 года асудзіла Беларусь за незахаванне правоў чалавека і заклікала афіцыйны Менск знайсці вінаватых у знікненні апазіцыйных дзеячаў.

Нагадаем, што ў 1999–2000 гады ў Беларусі бясследна зніклі лідэры апазіцыі Юры Захаранка, Віктар Ганчар, Анатоль Красоўскі і журналіст Зміцер Завадскі. У дачыненні да выкраданняў і забойстваў апазіцыянераў падазраецца вышэйшае кіраўніцтва краіны, у тым ліку і міністр унутраных спраў Беларусі Уладзімір Навумаў.