Лідэры партый: ЗША вядуць перамовы з Расеяй наконт змянення сітуацыі ў Беларусі :: Хартыя'97 :: Навiны

ЗША вядуць перамовы з Расеяй наконт развязання беларускага пытання. Пра гэта заявіў 5 сакавіка на прэс-канферэнцыі ў Менску першы сакратар ЦК Партыі камуністаў Беларускай Сяргей Калякін. З 27 лютага па 4 сакавіка адбыўся візіт прадстаўнікоў беларускіх дэмакратычных сілаў у ЗША. У склад дэлегацыі ўваходзілі лідэры АГП Анатоль Лябедзька, ПКБ Сяргей Калякін, Партыі БНФ Вінцук Вячорка, жонка старшыні Беларускай сацыял-дэмакратычнай партыі (Грамада) Ірына Казуліна і прадстаўнік недзяржаўных арганізацый Беларусі Сяргей Мацкевіч.

“Стаўленне ЗША у гэтых перамовах адназначнае: няма і не можа быць ніякага саюза Расеі і Беларусі датуль, пакуль у Беларусі парушаюцца правы чалавека, няма свабоды волевыяўлення грамадзянаў, існуюць палітвязні”, – заявіў на прэс-канферэнцыі С.Калякін. Пры гэтым ЗША, па яго словах, усё-ткі выступілі супраць падвышэння цэнаў на энерганосьбіты для Беларусі.

Прадстаўнікі амерыканскіх СМІ, з якімі сустракаліся беларускія палітыкі, “думаюць, што ў Расеі ёсць стратэгічны план супраць Лукашэнкі, але ён так глыбока схаваны, што ў Расеі яго ніяк не могуць дастаць”, – адзначыў С.Калякін.

“Тое, што мы рабілі ў Злучаных Штатах – гэта, насамрэч, прамы абавязак урада і Міністэрства замежных спраў”, – сказаў старшыня Нацыянальнага Камітэта дэмакратычных сілаў Анатоль Лябедзька на прэс-канферэнцыі.

Сам факт пацверджання інфармацыі пра абмеркаванне беларускага пытання Расеяй і ЗША ужо варта лічыць станоўчым, мяркуе А.Лябедзька. На яго думку, калі раней Масква “ўвогуле адмаўлялася абмяркоўваць гэтую праблему з Вашынгтонам, бо лічыла, што Беларусь уваходзіць у яе зону ўплыву, то цяпер сітуацыя змянілася – цяпер гэтае пытанне абмяркоўваецца сур’ёзна”.

Амерыканскія палітыкі запэўнілі беларускую дэлегацыю: Вашынгтон не будзе нічога абмяркоўваць закулісна. “Нам паведамілі, што гэтыя перамовы будуць адкрытымі, і магчымыя яны толькі з удзелам дэмакратычных сілаў Беларусі”, – заявіў А.Лябедзька.

А. Лябедзька распавёў пра мэты, дасягнутыя падчас візіту: “Мы лабіявалі прыняцце чагосьці накшталт плана Маршала для Беларусі. На сёння неабходная падтрымка спадарожнікавага тэлеканала для Беларусі, каб прарываць інфармацыйную блакаду. Фактычна вырашанае пытанне слуханняў у Кангрэсе па двух пытаннях: палітвязні і зніклыя палітыкі ў Беларусі. Ёсць упэўненасць, што да канца гэтага года такія слуханні адбудуцца”.

Лідэр камуністаў Сяргей Калякін падкрэсліў, што падыходы ЗША “наўрад ці будуць змяняцца з прычыны таго, што Лукашэнка на словах выявіў гатоўнасць да дыялогу з Захадам. Амерыканцы некалькі разоў паўтарылі: “Мы за дыялог, але словам мы верыць не будзем, мы будзем верыць пэўным крокам, рэальным зменам у вашай краіне”.