Украіна далучыцца да Еўрапейскай энергетычнай супольнасці :: Хартыя'97 :: Навiны

Далучэнне Украіны да Еўрапейскай энергетычнай супольнасці – адзін з галоўных прыярытэтаў энергетычнай палітыкі ЕЗ. Такую думку выказаў кіраўнік Генеральнага дырэктарата па справах знешніх стасункаў Еўрапейскай Камісіі Энэка Ландабуру падчас выступу на грамадскіх слуханнях “На шляху да агульнай еўрапейскай знешняй энергетычнай палітыкі”. Слуханні адбыліся 28 лютага ў Брусэлі.

Прадстаўнік Еўрапейскай Камісіі агучыў ключавыя прыярытэты знешняй энергетычнай палітыкі ЕЗ на бліжэйшыя тры гады. Сярод іх – пашырэнне Еўрапейскай энергетычнай супольнасці, у прыватнасці ўступленне Украіны, Нарвегіі, Турэччыны і Малдовы.

Энэка Ландабуру таксама заявіў пра важнасць уключэння “магутнага энергетычнага кампанента” ў новае пашыранае пагадненне з Украінай, якое будзе адлюстроўваць “стратэгічную важнасць партнёрства Украіны з ЕЗ”.

Сярод іншых прыярытэтаў знешняй энергетычнай палітыкі ЕЗ – пагадненне аб новых энергетычных стасунках з Расеяй, якое адлюстроўвае прынцыпы Еўрапейскай энергетычнай хартыі, умацаванне двухбаковых стасункаў з ключавымі дзяржавамі – пастаўшчыкамі і транзіцёрамі энергарэсурсаў, заключэнне і ўмацаванне міжнародных пагадненняў у сферы энергетыкі і барацьбы з зменай клімату, а таксама падвышэнне ўзроўню бяспекі ядзерных тэхналогій у краінах-суседзях ЕЗ.

17 лістапада 2006 года Украіна, Нарвегія, Турэччына і Малдова атрымалі статус назіральнікаў у Еўрапейскай энергетычнай супольнасці. На сёння удзельнікамі Супольнасці з’яўляюцца 27 дзяржаў-сябраў ЕЗ, а таксама Харватыя, Боснія і Герцагавіна, Сербія, Чарнагорыя, Албанія, Місія ААН у Косава і былая Югаслаўская Рэспубліка Македонія.