Сяргей Міхалок: Нам надакучыла іграць ролю дурняў :: Хартыя'97 :: Навiны

Група «Ляпис Трубецкой», якая прачнулася аднойчы раніцай папулярнай, цяпер можа страціць значную частку сваіх прыхільнікаў. Прычына – новы альбом пад назовам «Капітал», запісаны камандай пасля вялікага перапынку. У ім ні грама ранейшай іранічнай лірыкі, адна альтэрнатыва і суцэльны «здаровы цынізм».

– Разумееце, справа ў тым, што мы нечакана для сябе патрапілі ў струмень і зрабіліся заложнікам ўласнага вобразу, – растлумачылі «КП в Беларуси» Сяргей Міхалок і Павел Булатнікаў. – Усё прывыклі лічыць нас гэткімі дурнямі, але нам надакучыла. Цяпер мы вярнуліся да стану 1990-х гадоў, калі кожны наш канцэрт ператвараўся ў перфоманс з вершамі і незвычайнымі танцамі. Сёння мы граем альтэрнатыву, хоць некаторыя працягваюць думаць, што група кагосьці парадыруе.

Удзельнікі каманды прыехалі ў Кіеў, каб дапісаць апошнюю,12-ую песню з новага альбома. Дарэчы, над «Капіталам» беларусаў папрацаваў украінскі саўндпрадзюсер Віталь Цялезін, вядомы па супрацоўніцтве з групамі «Акіян Эльзы» і «Братья Гримм».

Рэліз «Капіталу» адбудзецца 1 траўня. Прызначылі гэтую дату хлопцы невыпадкова.

– Мы лічым сябе працоўным класам ад музыкі, – растлумачыў Сяргей Міхалок. А таксама прызнаўся, што не баіцца стромка змяняць курс узначаленага ім калектыву:

– Мы не асцерагаемся страціць прыхільнікаў. Нас будуць слухаць людзі, неабыякавыя да альтэрнатыўнай музыкі.

Каб замацаваць свой новы статус, каманда ў траўні адправіцца на рок-фэст у Карэю, дзе сыграе ска-панк.