Адміністрацыя ЗША адзначае пагаршэнне сітуацыі ў Беларусі і Расеі :: Хартыя'97 :: Навiны

Адміністрацыя ЗША лічыць, што сітуацыя ў сферы правоў чалавека і дэмакратыі ў Расеі пагаршаецца, а ў Беларусі працягвае выклікаць сур’ёзную заклапочанасць. Як паведамляе ИТАР-ТАСС, такую заяву зрабіў памочнік дзяржаўнага сакратара ЗША па пытаннях дэмакратыі і правоў чалавека Бары Лоўэнкрон. Ён выступіў у аўторак на спецыяльным брыфінгу для журналістаў з нагоды апублікавання амерыканскім знешнепалітычным ведамствам чарговага штогадовага дакладу аб захаванні правоў чалавека ў свеце за 2006 год.

Па словах Б.Лоўэнкрона, сам ён лічыць гэты справаздачны перыяд “годам адкату” ў забеспячэнні правоў і свабодаў чалавека. “Трывожна высокая колькасць краін прыняла або часткова ўжывала законы і пастановы, накіраваныя супраць няўрадавых арганізацый /НУА/ і сродкаў масавай інфармацыі. Прыклады ўключаюць у сябе новае абмежавальнае расейскае заканадаўства, якое тычыцца НУА, і абмежаванні, якія закранаюць Інтэрнэт, у Кітаі”, – сказаў амерыканскі дыпламат.

На просьбу ацаніць забеспячэнне правоў чалавека ў Беларусі ён адказаў, што “нічога добрага” сказаць наконт гэтага не можа. Пры гэтым Б.Лоўэнкрон паведаміў, што сустракаўся з прадстаўнікамі беларускай апазіцыі, якія наведалі Вашынгтон на мінулым тыдні. “Яны не маюць намеру здавацца. Яны збіраюцца працягваць націскаць на ўрад у Менску”, – падкрэсліў памочнік дзяржсакратара.