Рэжым выхаду з галадоўкі Казуліну адменены :: Хартыя'97 :: Навiны

Адвакат Ігар Рынкевіч сустрэўся 7 сакавіка з сваім падабаронным, экс-кандыдатам у прэзідэнты Беларусі Аляксандрам Казуліным у віцебскай калоніі №3. Па словах адваката, рэжым выхаду з галадоўкі палітвязню адмянілі. Нагадаем, што Казулін галадаў у калоніі 53 дні. Такім чынам палітык патрабаваў абмеркаваць сітуацыю ў Беларусі ў Радзе бяспекі ААН.

Прэс-служба А.Казуліна папрасіла Ігара Рынкевіча распавесці пра вынікі гэтай сустрэчы.

– 1-га сакавіка Аляксандр Уладзіслававіч пераведзены на дыетхарчаванне 5В у калоніі, гэта значыць, можна лічыць, што рэжым выхаду з галадоўкі яму адмянілі. У сувязі з гэтым адміністрацыя калоніі забараніла перадаць яму прадукты, пасланыя сваякамі. Адзінае, А.Казулін вызвалены ад працы. У астатнім для яго ніякіх абмежаванняў няма. Ён абавязаны наведваць усе ўнутраныя мерапрыемствы, – паведаміў адвакат.

Адвакат І.Рынкевіч напісаў заяву на імя начальніка калоніі, у якой просіць інфармацыю аб наяўнасці адпаведнага медыцынскага заключэння з медчасткі ВК–3 аб стане здароўя А.Казуліна. Адвакат пытае, на якой падставе было вынесенае рашэнне аб пераводзе А.Казуліна з рэжыму харчавання пасля выхаду з галадоўкі на звычайны дыетычны рэжым, а таксама аб забароне перадачы прадуктаў ад сваякоў.

У пакоі, у якім змешчаны А.Казулін, на 30 кв. м усталяваныя 22 ложка/месцы. Гэта пры норме 2,5 кв.м на чалавека. Аднак адміністрацыя працягвае дадаваць туды асуджаных, размяшчае іх на ложкі ў два ярусы. Прычым падсяляе людзей, на думку А.Казуліна, якія не зусім адэкватна сябе паводзяць. Таму А.Казулін лічыць, што нядаўна распаўсюджаная інфармацыя аб магчымых правакацыях па дачыненні да яго мае пад сабою глебу.

У гутарцы з кіраўнікамі калоніі І.Рынкевич выказаў заклапочанасць і трывогу аб стане здароўя і жыцці свайго падабароннага. Таму ў сваёй заяве на імя начальніка калоніі ён просіць адказаць яму, “…ці паступалі ад А.Казуліна якія-небудзь заявы аб канфліктах з ім іншых асуджаных, альбо ці маюцца такія заявы наконт А.У.Казуліна з боку асуджаных”.

І.Рынкевіча хвалюе, ці маюцца падставы меркаваць, што А.Казуліну пагражае якая-небудзь небяспека канфліктаў на бытавой глебе. Адміністрацыя калоніі запэўніла адваката, што разумее сваю адказнасць за кожнага асуджанага, у тым ліку за А.Казуліна.

А.Казулін даручыў сваім адвакатам у самы блізкі час завяршыць працу над нагляднай скаргай у Вярхоўны суд, бо лічыць, што ціск на адваката І.Рынкевіча , які апошнім часам узмацніўся, можа завяршыцца ўстараненнем яго ад абароны.