Туркменаў пусцілі ў Інтэрнэт пад надглядам вайскоўцаў :: Хартыя'97 :: Навiны

Ля ўвахода ў інтэрнэт-кафэ, якія нядаўна былі адчыненыя ў туркменскай сталіцы, дзяжураць салдаты, паведамляе Eurasianet. Што да працы салонаў, то яе, па дадзеных крыніцы, адрознівае нестабільная сувязь і высокія тарыфы. Адна гадзіна карыстання Інтэрнэтам каштуе 50 тысяч манатаў (каля 10 даляраў па афіцыйным курсе або 2,5 даляра па абменным курсе чорнага рынку, адзначае Eurasianet).

DW-WORLD.DE, у сваю чаргу, паведамляе, што кожны карыстальнік кафэ рэгіструецца па пашпарце. Пры гэтым супрацоўнікі ўстановы папярэджваюць наведвальнікаў пра шэраг абмежаванняў: напрыклад, пошту можна адчыняць толькі на серверы дзяржаўнага правайдэра (адзінага на ўсю краіну) – “Туркментэлекома” – “каб не абцяжарваць працу кампутараў выхадам на іншыя лініі”.

Пры спробе зайсці на сайты некаторых расейскіх выданняў, паведамляе крыніца выдання, якая наведала кафэ, на дысплеі з’явілася паведамленне пра памылку, а да самога карыстальніка падышлі два чалавека ў цывільным. Пасля гэтага няўдачлівага інтэрнэтчыка адвялі ў Генеральную пракуратуру: там яму паведамілі, што ставяць яго на ўлік, адзначыўшы, што робяць гэта “не для барацьбы з іншадумствам, а для таго, каб радзіма была чыстая ад усякага смецця”.

Супрацоўнікі пракуратуры заявілі крыніцы, што ён, “на яго шчасце”, не паспеў адкрыць нічога крамольнага, а інакш з ім размаўлялі б “у іншым месцы і іншымі метадамі”. Прадстаўнік “Туркментэлекома”, з свайго боку, пацвердзіў выданню, што доступ да некаторых сайтаў у інтэрнэт-кафэ Ашхабада загадзя заблакаваны: сярод іх, у прыватнасці, старонкі туркменскай апазіцыі, а таксама шэраг замежных СМІ, паведамляе Lenta.Ru.

Нагадаем, што на пачатку 2000-х гадоў, падчас кіравання Сапармурата Ніязава, доступ у Інтэрнэт для жыхароў Туркменістана быў рэзка абмежаваны. Асноўнымі карыстальнікамі Сеціва сталі дзяржаўныя структуры. Напярэдадні прэзідэнцкіх выбараў 2007 года кіроўны кандыдат Гурбангулы Бердымухамедаў (які пасля і стаў прэзідэнтам) паабяцаў зрабіць масавым доступ да сучасных сродкаў камунікацыі. Неўзабаве, пасля таго, як ён уступіў на пасаду, у Ашхабадзе былі адчыненыя некалькі інтэрнэт-кафэ.