Крымінальная справа ўзбуджаная на яшчэ аднаго моладзевага актывіста :: Хартыя'97 :: Навiны

12 сакавіка ў пракуратуры Рэспублікі Беларусь моладзеваму актывісту Аляксею Янушэўскаму заявілі, што ён, як і актывістка апазіцыі Наста Палажанка, зьяўляецца падазроным па справе, узбуджанай па артыкулу 193.1 Крымінальнага кодэксу – “дзейнасць ад імя незарэгістраванай арганізацыі”.

Насту Палажанку выклікалі на допыт учора на 14:00, аднак, паколькі дзяўчына зьяўляецца непаўнагадовай, сьледчы Грахоўскі перанёс допыт на 13 сакавіка, які адбудзецца ў 11.30 пры прысутнасьці бацькі й сацыяльнага пэдагогу гімназіі, дзе Наста навучаецца. Аляксей Янушэўскі прыйшоў у пракуратуру ў 17.00, допыт хлопца працягваўся каля чатырох гадзінаў. Палажанка й Янушэўскі далі падпіскі, што яны будуць зьяўляцца на выклікі з пракуратуры.

У той жа час адбываюцца допыты сяброў незарэгістраванай арганізацыі “Малады Фронт” па ўсёй краіне. Як паведаміў актывіст Максім Азараў, 13 сакавіка да яго прыйшлі супрацоўнікі праваахоўных ворганаў з позвай у пракуратуру горада.

— Нягледзячы на крымінальны перасьлед, на рэпрэсіі супраць “Маладога Фронту”, — заяўляюць у арганізацыі, — актывісты руху працягваюць казаць аб тым, што МФ не спыніць сваёй дзейнасьці й будзе, як і раней, адкрытым і дэмакратычным шляхам ісьці да сваіх мэтаў — абароны незалежнасьці Беларусі, выхаваньня маладога пакаленьня беларусаў паводле нацыянальнай ідэі й хрысьціянскіх прынцыпаў, дэсаветызацыі беларускага грамадзтва.

4 лютага беларускія спэцслужбы затрымалі на прыватнай кватэры 27 актывістаў “Маладога Фронту” — пасьля складаньня пратаколаў на іх усіх, акрамя актывістаў Зміцера Хведарука і Алега Корбана, адпусьцілі. Пасьля пратрыманьня Хведарука і Корбана тры дні ў сьледчым ізалятары ім аб’явілі абвінавачаньне ў дзейнасьці ад імя незарэгістраванай арганізацыі — актывістам пагражае штраф, або арышт на тэрмін да шасьці месяцаў, або пазбаўленьне волі на тэрмін да двух гадоў.