Лукашэнка адпачывае ў Сочы са спявачкамі і спартсменамі :: Хартыя'97 :: Навiны

Аляксандр Лукашэнка праводзіць свой традыцыйны тыднёвы водпуск у канцы зімы на беларускім горналыжным курорце ў Сочы. Адпачывае Аляксандр Лукашэнка ў гасцініцы на 30 двухмесных нумароў з спартовай і трэнажорнай заламі. Разам з ім у гасцініцы пражываюць Ірына Дарафеева, спявачка Жанэт, спявак Шыр і беларускія спартсмены.

“Нас усіх прыслалі рыхтавацца да прыезду прэзідэнта прама восьмага сакавіка. Трэба было ўсё паспець да адкрыцця”, – паведаміла “КП в Беларуси” супрацоўніца беларускай гасцініцы ў Сочы.

“Тут усе задаволеныя. Запаліліся горнымі лыжамі. Катаемся з цікавасцю. Толькі вось сёння вялікая смуга. Жывем у новым комплексе “Беларусь”, – распавяла Алімпійская чэмпіёнка Юлія Несцярэнка ў інтэрв’ю “КП в Беларуси”. – Да абеду катаемся кожны дзень. Увечары ў комплексе ходзім у басейн, сауну, більярд, трэнажорную залу”.

Аляксандр Лукашэнка 10 сакавіка ўзяў удзел у Сочы ў цырымоніі адкрыцця беларускага горналыжнага комплексу. Аляксандр Лукашэнка падчас цырымоніі падзякаваў расейскае кіраўніцтва за садзейнічанне ў выдзяленні ўчастку пад беларускі комплекс, а таксама за стварэнне спрыяльных умоваў для яго ўзвядзення.

На думку Лукашэнкі, на подступе да 2014 года кошт аб’ектаў у раёне Сочы будзе працягваць расці, “незалежна ад таго, будзе там Алімпіяда ці не”. Па дадзеных расейскага інфармагенцтва, Аляксандр Лукашэнка агледзеў горналыжны комплекс і застаўся ім задаволены.