«Транснефть» не хоча накіроўваць нафту цераз Беларусь :: Хартыя'97 :: Навiны

Кіраўнік “Транснефти” Сямён Вайншток кажа, што на сёння праблем з транзітам расейскай нафты цераз Беларусь няма, але мяркуе, што трэба засцерагчы ад небяспекі заходніх спажыўцоў у будучыні. “Што да Беларусі, то сёння гэтай праблемы няма. Але дыверсіфікаваць напрамак, засцерагчы нашых заходніх партнёраў ад транзітных напружанняў, вядома, будзе неабходна”, – сказаў Вайншток у інтэрв’ю інфармацыйнаму тэлеканалу “Вести”.

“І вось з 100 мільёнаў тон, якія праходзяць цераз і ў Беларусь, мы мяркуем, што на 50 мільёнаў трэба нафтавікам прапанаваць іншы маршрут, хоць у нафтавікоў можа застацца права карыстацца старым маршрутам – цераз Беларусь”, – лічыць кіраўнік “Транснефти”.

“Гэтае дыверсіфікаванне – абарона больш заходніх партнёраў ад паўтору такіх сітуацый”, – сказаў Вайншток, маючы на ўвазе студзеньскі нафтавы канфлікт паміж Расеяй і Беларуссю, калі беларускі бок адмовіўся прапускаць нафту для заходніх спажыўцоў.

Гаворачы пра сітуацыю з пастаўкамі расейскай нафты ў Літву, Вайншток канстатаваў, што гэта не пытанне стасункаў з Літвой, а тэхнічная праблема, якую “Транснефть” будзе вырашаць у самыя блізкія тэрміны.

На расейскім участку “Дружба”, па якім нафта пастаўляецца на літоўскі нафтаперапрацоўчы завод Mazeikiu Nafta, 29 ліпеня 2006 года адбыўся аварыйны разліў нафты, пасля якога “Ростехнадзор” забараніў даваць у нафтаправодзе працоўны ціск.

“Ростехнадзор” паведаміў 14 лютага, што падаўжае тэрміны праверкі аварыйнага ўчастку.

Вайншток сказаў, што кампанія чакае рашэння “Ростехнадзора”. “І калі гэтае рашэнне для нас даволі прымальнае ў частцы капітальных укладанняў або ў рэканструкцыю, або рамонт, або замену трубаправодаў, то мы пастараемся ў самыя кароткія тэрміны гэтую праблему зняць”, – запэўніў ён.