Рональд Пофала: «Беларусам могуць знізіць кошт візаў у Еўропу» :: Хартыя'97 :: Навiны

Генеральны сакратар кіруючай партыі Нямеччыны Хрысціянска-дэмакратычнага саюзу Рональд Пофала перакананы, што пытанне зніжэння памеру візавых збораў для грамадзянаў Беларусі, будзе станоўча вырашана ў нямецкім Бундэстагу. У лісце да лідэра дэмакратычных сіл Беларусі Аляксандра Мілінкевіча, генеральны сакратар ХДС паведаміў, што на сённяшні дзень абмеркаванне беларускага візавага пытання ідзе ў фракцыі ХДС/ХСС у Бундэстагу.

- Я настойліва выступіў за такое вырашэнне візавага пытання, у межах якога выдача віз, у першую чаргу, маладым людзям з Беларусі, будзе адбывацца на значна лепшых для беларусаў фінансавых умовах. Я ўпэўнены ў тым, што нам удасца дамагчыся ў гэтым пытанні станоўчага рашэння, - адзначыў Рональд Пофала ў лісце да Аляксандра Мілінкевіча.

Рональд Пофала падкрэсліў таксама, што развіццё падзеяў у Беларусі знаходзіцца пад пільнай увагай кіраўніцтва Германіі. Паводле спадара Пофалы, сітуацыя ў Беларусі з’яўляецца пастаяннай тэмай ягоных размоваў з канцлерам Германіі Ангелай Меркель

Зніжэнне коштаў віз для грамадзянаў Беларусі ёсць адным з прыярытэтаў еўрапейскай палітыкі Аляксандра Мілінкевіча, які неаднаразова заклікаў Еўрасаюз не падвышаць для беларусаў кошты на шэнгенскія візы:

- Для пераважнай большасці беларусаў надзвычай неабходны вольны кантакт з Захадам. Высокімі коштамі на візы фактычна будуецца новая “жалезная заслона”. А гэта толькі на карысць рэжыму Аляксандра Лукашэнкі, які ўвесь час палохае беларусаў тым, што “на Захадзе нас ніхто не чакае”, - лічыць лідэр дэмакратычных сіл Беларусі Аляксандр Мілінкевіч.