Вандалы дагэтуль не знойдзеныя :: Хартыя'97 :: Навiны

Супрацоўнікі Менскага РУУС працягваюць следчыя дзеянні па факце разбурэння невядомымі “лавы Клінтана” ва ўрочышчы Курапаты, нягледзячы на тое, што 15 лютага была вынесеная пастанова аб адмове ва ўзбуджэнні крымінальнай справы. Як паведаміў БелаПАН даследчык тэмы сталінскіх рэпрэсій кандыдат гістарычных навук Ігар Кузняцоў, 12 сакавіка оперупаўнаважаны Бараўлянскага аддзела Менскага РУУС Дзяніс Дудараў яшчэ раз апытаў сведак, якія першымі заўважылі апаганенне памятнага знака.

“У гутарцы з оперупаўнаважаным я зноў звярнуў яго ўвагу на тую акалічнасць, што разбурэнне лавы з’яўляецца не выпадковым, а наўмысным дзеяннем, выканаўцаў якога варта шукаць не ў асяродку бамжоў і людзей, якія раней здзяйснялі правапарушэнні, а сярод прадстаўнікоў шэрагу незарэгістраваных арганізацый, у тым ліку Расейскага нацыянальнага адзінства, чыю абрэвіятуру часцей за ўсё пакідаюць пасля сябе злачынцы на апаганеных мемарыяльных знаках. Менавіта гэтыя людзі нічога не хочуць чуць пра падзеі, якія адбыліся ў Курапатах 70 гадоў назад – у перыяд кульмінацыі сталінскага тэрору”, – падкрэсліў І.Кузняцоў.

Факт разбурэння і знікнення прыкладна трэцяй часткі мемарыяльнага знака з надпісам на беларускай мове “Ад народа Злучаных Штатаў Амерыкі народу Беларусі ў імя памяці”, усталяванага прэзідэнтам ЗША Білам Клінтанам у 1994 годзе, быў выяўлены 30 студзеня падчас сімвалічнай акцыі запальвання памінальных свечак на пахаваннях ахвяр сталінізму ва ўрочышчы, якое з’яўляецца помнікам гісторыі міжнароднага значэння. У 1920–1940-е гады там знішчаліся рэпрэсаваныя – выхадцы Беларусі і іншых краін.

Пастанова аб адмове ва ўзбуджэнні крымінальнай справы была вынесеная на падставе недастатковасці дадзеных, якія сведчаць пра прыкметы злачынства, а таксама таго, што не прадставілася магчымым усталяваць сведак здарэння, якое пашкодзіла памятны знак. Акрамя таго, у пастанове гаворыцца, што "лава Клінтана" нідзе на балансе не стаіць і немагчыма высветліць кошт памятнага знака, а таксама нанесеную яму матэрыяльную шкоду.

За перыяд з моманту ўсталявання лава 11 разоў падвяргалася апаганенню. Злачынцы не былі знойдзеныя.